شاباش عمران خان‘ ڈٹ جائو

لکھت:محمد اکرم چوہدری

اسلامی جمہوریہ پاکستان دے عوامی وزیراعظم عمران خان نے اشارہ دتا اے کہ اوہ کنک تے چینی دے بحران تے تحقیقاتی رپورٹ نوں منظرعام تے لیان گے۔ وزیراعظم ہاؤس دے باخبر بندے خبر دیندے نیں کہ وزیراعظم عوام نوں تکلیف اپڑان تے مہنگائی دے راہیں عوام دے معاملات زندگی نوں خراب کرن والیاں نوں کیفر کردار تک اپڑایا جاوے گا۔ وزیراعظم ہاؤس توں ملاقات دی خبراں نوں جانن والے دس رہے نیں کہ صرف رپورٹ ای منظرعام تک نہیں آوے گی سگوں ذمہ داراں نوں انجام تک وی اپڑایا جاوے گا۔عمران خان کنک تے چینی بحران تے سخت پریشان رہے۔ اوہ بدانتظامی تے مفاد پرستی کرن والے عناصر نوں نظر انداز نہیں کرنا چاہندے۔ وزیراعظم کہندے نیں عوام نوں تکلیف اپڑان والے دی میری حکومت وچ کوئی تھاں نہیں اے۔ ایہ ساری گلاں بغیر تصدیق وزیراعظم دی سوچ نوں ظاہر کردیاں نیں تے حقیقی معنیاں وچ عمران خان پاکستان دے عوام لئی اجہے ای جذبات رکھدے نیں۔ وزیراعظم نہ تے کاروبار کردے نیں نہ زمیندار نیں نہ کارخانیاں دے مالک نیں نہ ای اوہ کاروبار نال پیسہ کمان والی شخصیت نیں۔ ستر، اسی تے نوے دی دہائی توں اوہناں نوں جانن والے گواہی دین گے کہ عمران خان مالی لحاظ نال کمزور، گھٹ وسائل رکھن والے بندیاں لئی کناں درد رکھدے نیں۔ اوہ قوم دے نوجواناں نوں اعلیٰ تعلیم یافتہ تے خود مختار ویکھنا چاہندے نیں۔ اوہ دل نال ملک دی خدمت کرنا تے نوجواناں دا معیار زندگی تے سوچ دا معیاربلند کرن دے خواہشمند نیں۔ حکومت وچ آن دے بعد وی اوہناں دے جذبے وچ کوئی کمی نہیںآئی۔ ٹھیک اے کہ اوہناں دی حکومت اجے تک عوامی خدمت، فلاح تے عام بندے دی زندگی نوں آسان بنان لئی وڈے منصوبیاں تے کم نہیں کر سکی پر ایہدے وچ وی کوئی شک نہیں کہ ایس دوران وزیراعظم نے سارا ویلا دوجی وڈی مشکلات نوں حل کردیاں گزاریا اے۔ دوجے سیاستداناں تے حکمراناں نے ذاتی کاروبار، خاندانی کاروبار یاں رشتہ داراں نوں مالی فائدہ اپڑان دے بجائے ملک دی خدمت وچ ای گذاریا اے۔ہن عمران خان نے اپنی سیاست نوں اک نویں مرحلے وچ داخل کرن دا اشارہ دتا اے۔ کنک تے چینی دے بحران توں فائدہ چُکن والے سیاستداناں نوں منطقی انجام تک اپڑان دا فیصلہ کیتا اے۔ درحقیقت ایہو اوہ عمران خان نیں جہنوں پاکستان دے عوام نے ووٹ دتا اے، ایہو اوہ عمران خان نیں جہڑے ملک وچ تبدیلی دے نعرے دے نال سیاست دے میدان وچ آئے سن، ایہو اوہ عمران خان نیں جہناں نوں عوام نے روایتی سیاست تے روایتی طرز حکمرانی دے خاتمے لئی ایوان اقتدار تک اپڑایا اے، ایہو اوہ عمران خان نیں جہناں لئی رشتہ دار، دوست تے جانن والے نہیں ملک و قوم دا مفاد عزیز اے۔ ایہناں لفظاں وچ اوہی عمران خان نظر آندا اے جہنوں اسیں دہائیاں توں جاننے آں، ایہو اوہ کپتان اے جہڑا ٹیم دے مفاد وچ سخت فیصلے کرن دی خداداد صلاحیتاں نال مالا مال اے۔ عمران خان نے روایتی سیاست نوں ٹھوکر ماری اے اوہناں نوں روایتی سیاستداناں نوں وی منطقی انجام تک اپڑانا اے۔ ایہ فیصلہ عمران خان دے سیاسی کیریئر نوں اک نواں رنگ دے سکدا اے، ایہ فیصلہ عمران خان دی حکومت تے عوامی سطح تے مقبول بنا سکدا اے۔ حکومت نوںمقبول بنان توں ودھ کے ایہ فیصلہ اوہناں نوں پاکستان دی سیاسی تریخ وچ امر کر سکدا اے۔ ماضی وچ کدی حکومت وچ شامل شخصیات یاں فیر حکومتی شخصیات دے نال قریبی تعلقات رکھن والے بندیاں دے خلاف عوام نوںنقصان اپڑان، نجائز منافع خوری یاں بحران پیدا کرن دے بعد مالی فائدہ حاصل کرن والیاں نوں کدی کٹہرے وچ نہیںلیایاگیا۔ہن عمران خان نے وسیع تر عوامی مفاد وچ ایہ فیصلہ کیا اے تے جان۔ قوم نوں نقصان اپڑان والے، غریب عوام دی مجبوری توں فائدہ چُکن والیاں دے خلاف بے رحمانہ فیصلہ کرن۔ وزیراعظم ایس قوم نوں اپنے شانہ بشانہ پان گے۔ پاکستان دے عوام نے عمران خان نوں کدی کلیاں نہیں چھڈیا، عوام نے اوس ویلے وی عمران خان نوں پُھلاں وچ لدیا جدوں اوہ وزیراعظم نہیں سن، قوم نے اوس ویلے وی عمران خان نال محبت کیتی جدوں اوہ قومی اسمبلی وچ صرف اک سیٹ رکھدے سن، قوم نے اوس ویلے وی عمران خان نال پیار کیتا جدوں اوہ انتخابی مہم دے دوران ڈگ کے زخمی ہو گئے سن، قوم نے 2018دے انتخابات وچ پنج سیٹاں توں کپتان نوں کامیاب کروایا۔ ہن تے عمران خان بااختیار وزیراعظم نیں ہن اوہناں ے قوم دا قرض اتارنا اے اوہ محبتاں واپس کرنیاں نیں۔ ہن واری عمران خان دی اے اوہناں نوں اجہے سارے معاملیاں وچ بے رحم ہونا پوے گا کیوں جے اوہ وزیراعظم ایس ملک دے عوام دے نیں، اوہناں نوں ایس اعلیٰ عہدے تے اپڑان لئی لوکاں نے اپنا خون پسینہ روڑھیا اے اوہناں نوں چند طاقتور سیاستداناں یاں مالداراں دے ہتھوں بلیک میل نہیں ہونا۔ وزیراعظم نے عوام دے نال کھڑا ہون دا فیصلہ کیتا اے۔ اک عوامی وزیراعظم توں اجہے ای فیصلے دی توقع کیتی جا سکدی اے۔ عوام دے ووٹاں نال منتخب ہون والیاں نوں عوام دے نال ای کھڑا ہونا چاہیدا اے۔ جمہوری نظام تے وزیراعظم دے عہدے تے عوام دا اعتماد ایسے صورت بحال ہو سکدا اے جدوں عمران خان دے دفتر توں اجہے احکامات جاری ہون جہناں نال عوام دے مسئلے حل ہون تے عام بندے دی زندگی وچ آسانی پیدا ہووے۔ وزیراعظم تسیں ڈٹ جاؤ، تسیں عوام دا خون چوسن والیاں دے خلاف جہاد کرو قوم تہاڈے نال سی قوم تہاڈے نال اے تے قوم تہاڈے نال رہوے گی۔