وزیراعلیٰ پنجاب عثمان بزدار دا چیف منسٹر ایمرجنسی فنڈ دے قیام دا اعلان

لہور: وزیراعلیٰ پنجاب عثمان بزدار نے چیف منسٹر ایمرجنسی فنڈ دے قیام دا اعلان کر دتا۔ لہور دے ایکسپو سنٹر وچ 900بستر دے خصوصی فیلڈ ہسپتال دے قیام دی وی منظوری دتی گئی۔ وزیراعلیٰ پنجاب سردار عثمان بزدار نے کرونا وائرس دی روک تھام لئی اہم فیصلے کردیاں کمشنر لہور ڈویژن نوں ایکسپو سنٹر وچ فیلڈ ہسپتال دے قیام لئی فوری اقدامات دی ہدایت کر دتی۔

وزیراعلیٰ دی ہدایت تے محکمہ خزانہ نے ہنگامی بنیاداں تے فنڈز دا اجراء کر دتا۔ عثمان بزدار نے بلوچستان حکومت توں تعاون تے تفتان وچ قرنطینہ مرکز دے قیام دا جائزہ لین دے حوالے نال وزارتی کمیٹی تشکیل دتی۔ وزیراعلیٰ پنجاب آکھیا بلوچستان دی ہر ممکن مدد کراں گے۔

اوہناں نے ڈاکٹراں تے ہیلتھ پروفیشنلز دے مسئلیاں دے حل لئی وی کمیٹی بنا دتی۔ اوہناں دا کہنا سی کرونا وائرس دے مریضاں دی دیکھ بھال کرن والے ڈاکٹرز ساڈے ہیرو نیں، ڈاکٹراں دی حوصلہ افزائی ضروری اے۔