کورونا وائرس: اسلام آباد ہائیکورٹ دا معمولی جرائم والے قیدیاں دی رہائی دا حکم

اسلام آباد ہائیکورٹ نے کرونا وائرس دا پھیلاؤ روکن لئی اڈیالہ جیل توں معمولی جرائم وچ ملوث تے 7ورھے توں گھٹ سزا والے قیدیاں دی رہائی دا حکم جاری کر دتا۔ اسلام آباد ہائی کورٹ دے چیف جسٹس اطہر من اللہ نے اڈیالہ جیل وچ 1362قیدیاں دی ضمانت تے رہائی دے کیس دی سنوائی کیتی جہدے وچ دس ورھے توں گھٹ سزا دے انڈر ٹرائل قیدیاں دی ضمانت تے رہائی تے غور کیتا گیا۔

عدالت نے ریمارکس دتے اڈیالہ جیل وچ 2174قیدیاں دی گنجائش موجود اے پر ایس ویلے 5001قیدی موجد نیں، 1362قیدیاں دے عدالتاں وچ ٹرائل زیر التوا نیں، کرونا وائرس دے خطرے دے پیش نظر کیوں نہ انڈر ٹرائل قیدیاں نوں رہا کر دتا جاوے۔

چیف جسٹس اسلام آباد ہائی کورٹ نے آکھیا جے اک وی متاثرہ مریض جیل دے اندر چلا گیا تے جیل وچ موجود قیدیاں نوں متاثر کر سکدا اے، ایران نے تے جیلاں توں سارے قیدی کڈھ دتے نیں، خدانخواستہ کسے قیدی نوں کرونا ہو گیا تے فیر قابو نہیں آوے گا۔