نگران وزیراعظم لاپتہ کارکناں دی بازیابی لئی اقدم کرن ، پی ٹی آئی

اسلام آباد (بیوروروپورٹ)پاکستان تحریک انصاف نے نگران وزیراعظم تے چیف الیکشن کمشنر توں جبری طور اتے لاپتہ کیتے گئے اپنے ذمہ داراں تے کارکناں دی بازیابی دا مطالبہ کردتا ۔سیکرٹری جنرل عمر ایوب خان نے نگران وزیر اعظم تے چیف الیکشن کمشنر نوں وکھ وکھ خط لکھ دتے ،خط دی نقل چاروں نگران وزرائے اعلی نوں وی گھل دتی گئی ۔ عمر ایوب خان نے آکھیا کہ تحریک انصاف دے رہنما فرخ حبیب، صداقت عباسی، عثمان ڈار، اویس یونس، عرفان سلیم، عبدالکریم خان تے عوامی مسلم لیگ دے سربراہ شیخ رشید کئی دن توں لاپتہ نیں۔ عمر ایوب خان نے آکھیا کہ اینہاں ساریاں افراداں دیاں جبری گمشدگیاں آئین وچ فراہم کردہ بنیادی حقوق دی صریح خلاف ورزی اے۔ عمر ایوب خان نے آکھیاکہ جد تک اینہاں افراداں نوں رہا تے جبری گمشدگیاں دے ذمہ داراں نوں کٹہرے وچ نہیں لیایا جاندا آئندہ عام الیکشن دی شفافیت اتے سوالیہ نشان رہے گا۔ عمر ایوب خان نے آکھیا کہ امید اے کہ جبری طور اتے گمشدہ کیتے گئے افراد دے معاملے نوں سنجیدگی نال ویکھدیاں ہویاں متعلقہ اداریاں نوں اونہاں دی فوری بازیابی دے احکامات جاری کیتے جان گے۔