عدالت نے اکتوبر توں فروری تک نویں ترقیاتی منصوبیاں اُتے کم روک دتا

لہور( پنجابی میڈیا گروپ)لہور ہائیکورٹ نے اکتوبر توں فروری تک شہر وچ نویں ترقیاتی منصوبیاں اُتے کم روک دتا۔لہور ہائیکورٹ وچ تدارک سموگ بارے درخواستاں اُتے سماعت ہوئی، جسٹس شاہد کریم نے درخواستاں اُتے سماعت کیتی۔عدالت نے وکیل پنجاب حکومت توں استفسارکیتا کہ 1 مہینے وچ کِنے پراجیکٹ شروع کیتے گئے نیں، پنجاب حکومت دے وکیل نے عدالت نوں دسیا کہ شہر وچ 5منصوبیاں اُتے ایس ویلے کم جاری اے، شاہدرہ وچ جاری پراجیکٹ وی چھیتی مکمل ہو جائے گا۔جسٹس شاہد کریم نے حکم دتا کہ نیازی انٹرچینج ٹو بابو صابو پراجیکٹ اُتے کم شروع نہ کرو، فروری وچ شروع کر لین، جیہڑا پراجیکٹ چل رہیا اے اوہ ٹھیک اے، ایئر کوالٹی اُتے پراجیکٹ کِنا اثر کرے گا ایہ وی دسیاجائے، آئندہ سماعت اُتے جیہڑا ڈیٹا جمع ہویا اے اوس دی روشنی وچ عدالت نوں آگاہ کرن جوڈیشل واٹر اینڈ انوائرمینٹل کمیشن نے تجویز دتی کہ سموگ دے سیزن دوران کوئی تعمیراتی پراجیکٹ شروع نہیں ہونا چاہیدا، عدالت نے ریمارکس وچ آکھیا کہ ایہ بلکل ٹھیک تجویز اے ایسا ہی ہونا چاہیدا۔پنجاب حکومت دے وکیل نے عدالت نوں دسیا کہ سڑکاں دی الائنمنٹ لئی وی کم کر رہے ہاں ، جس اُتے جسٹس شاہد کریم نے آکھیا کہ جیل روڈ سنے ہوراں سڑکاں دے ایشوز نیں، جگہ جگہ سڑکاں اُتے یو ٹرن نہیں ہونے چاہیدے یوٹرن فاصلے اُتے رکھو۔عدالت عالیہ نے مزید آکھیا کہ پانی نوں بچان لئی کم کرنا ہوئے گا، 10مرلے دے گھراں دی تعمیر وچ وی واٹر ٹریٹمنٹ پلانٹ لازمی ہونی چاہیدی اے، آئندہ سماعت اُتے پروپوزل بنا کے عدالت وچ پیش کرن۔