مریم نواز دی غزہ اُتے اسرائیلی حملیاں دی مذمت، فلسطینیاں نال اظہار یکجہتی

لہور( پنجابی میڈیا گروپ)پاکستان مسلم لیگ(ن)دی سینئر نائب صدر تے چیف آرگنائزر مریم نواز نے غزہ اُتے اسرائیلی حملیاں دی مذمت تے فلسطینیاں دے نال یکجہتی دا اظہار کیتا اے۔مریم نواز نے اپنے بیان وچ آکھیا اے کہ غاصب فوج دے خلاف اپنی آزادی لئی لڑنا فلسطینیاں دا حق اے، ظالم و غاصب دے خلاف مظلوم دا ساتھ دینا ہی انصاف اے، عالمی قنون، سلامتی کونسل دیاں قرارداداں تے 2 ریاستی حل دے سمجھوتیاں دیاں دھجیاں اڑان والی غاصب فوج موجودہ حالات دی ذمہ دار اے۔سینئر نائب صدر مسلم لیگ ن نے آکھیا کہ مقبوضہ جموں و کشمیر وچ بھارت تے مقبوضہ فلسطینی علاقیاں وچ اسرائیل نسل کشی تے ریاستی اَت گردی دے مجرم نیں، مقبوضہ جموں و کشمیر تے مقبوضہ فلسطین بارے وچ عالمی قنون تے سلامتی کونسل دیاں قرارداداں اُتے عملدرآمد کران نال ہی پائیدار امن قائم ہو سکدا اے۔اونہاں دا کہنا سی کہ اسلامی ملک فلسطینیاں نوں خوراک تے امدادی شیواں دی فراہمی لئی کردار ادا کرن، عالمی ادارے تنازع دے پُرامن تے منصفانہ حل لئی عملی کردار ادا کرن، انسانی جاناں دے ہور نقصان توں بچن لئی فوری اقدام کیتے جان، پوری امت مسلمہ دی دعا اے کہ مقبوضہ جموں و کشمیر تے فلسطین غاصبانہ قبضے توں آزاد ہون۔