طوفان الاقصی؛ اسرائیلی ہلاکتاں دی تعداد 700 تے 500 توں وَدھ فلسطینی شہید

تل ابیب( پنجابی میڈیا گروپ)حماس دے طوفان الاقصی آپریشن وچ اسرائیلی ہلاکتاں دی تعداد 700 جدکہ فلسطینی شہیداں دی تعداد500 توں اُتے ہوگئی۔ہفتہ والے دن شروع ہون والی لڑائی اتوار نوں وی سارا دن جاری رہی۔ اسرائیل اُتے غیر متوقع حملے دے بعد حزب اللہ وی لبنان توں صہیونی ریاست نوں نشانہ بنارہی اے۔ حماس دے جنگجو اجے وی اسرائیلی مقبوضہ علاقیاں اندر موجود نیں جیتھے اوہناں کئی مقاماں اُتے اسرائیلی فوج نال دو بدو جھڑپاں ہورہیاں نیں۔عالمی خبر رساں ادارے مطابق حماس دے اچانک حملے بعدوں اسرائیلی فوج اجے تک سنبھل نہیں پائی اے۔ مختلف جھڑپاں وچ اسرائیلی ہلاکتاں دی تعداد 700 توں تجاوز کرگئی جنہاں وچ سیکڑاں فوجی تے پلس اہلکار شامل نیں دُوجے پاسے اسرائیلی فوج نے بزدلانہ کارروائی وچ غزہ اندر حماس دے کمانڈراں دے گھراں اُتے ساری رات بمباری کیتی۔ ہر پاسے تباہی دے منظر نیں، اینہاں حملیاں وچ بالاں سنے 500 توں وَدھ فلسطینی شہید ہوچکے نیں۔اُدھر لبنان دی حزب اللہ نے اسرائیلی سرزمین اُتے مارٹر شیلاں نال حملے کیتے جس نال وڈھے پیمانے اُتے اسرائیلی ہلاکتاں دا امکان اے۔ اسرائیل نے وی لبنان اُتے میزائل مارے لیکن کسی نقصان دی اطلاع تاحال موصول نہیں ہوئی۔