سپرنٹنڈنٹ اڈیالہ جیل توں چیئرمین پی ٹی آئی دی سکیورٹی بارے رپورٹ منگ لئی گئی

اسلام آباد( پنجابی میڈیا گروپ)انسدادِ دہشتگردی عدالت اسلام آباد نے سپرنٹنڈنٹ اڈیالہ جیل توں چیئرمین پی ٹی آئی دی سکیورٹی بارے رپورٹ منگ لئی۔چیئرمین پی ٹی آئی تے اسد عمر خلاف جوڈیشل کمپلیکس توڑ پھوڑ تے الیکشن کمیشن احتجاج کیس بارے انسداد دہشتگردی عدالت اسلام آباد وچ سماعت ہوئی، جج ابوالحسنات ذوالقرنین دی عدالت وچ اسد عمر پیش ہوئے۔چیئرمین پی ٹی آئی دے وکیل جان محمد تے پراسیکیوٹر راجا نوید وی اے ٹی سی وچ پیش ہوئے۔وکیل صفائی جان محمد نے چیئرمین پی ٹی آئی دے عدالتی پروڈکشن دی درخواست دائر کر دتی تے آکھیا کہ چیئرمین پی ٹی آئی اینہاں کیساں وچ ضمانت اُتے نیں، جیل ٹرائل نہیں ہو سکدا، ریاست دی ذمہ داری اے کہ جیل توں عدالت لیان دے انتظاماں نوں ویکھیا جائے، ملزم نوں عدالت وچ پیش کرنا پلس دی ذمہ داری ہُندی اے ۔ چیئرمین پی ٹی آئی دے وکیل نے آکھیاکہ سابق وزیراعظم نوں ٹرائل لئی جیل توں کورٹ توں لیانا پئے گا، چیئرمین پی ٹی آئی خود عدالت آن گے تے ہاں یا نہ کرن گے، عدالت احکامات جاری کرے تے پلس چیئرمین پی ٹی آئی نوں عدالت وچ پیش کرن دی پابند اے۔