پلس خدمت مرکزاں سَنے تھانہ کلچر وی بدلن دی لوڑ اے،محسن نقوی

لہور( پنجابی میڈیا گروپ) نگران وزیراعلی پنجاب محسن نقوی نے آکھیا اے کہ پلس دے خدمت مرکزاں سنے ساہنوں تھانہ کلچر نوں وی تبدیل کرنا اے۔پنجاب ہائی وے پٹرولنگ پلس لئی نویاںگڈیاں تے یونیفارم دین دی تقریب منعقد ہوئی جس وچ وزیراعلی پنجاب نے بطوراُچیچے پروہنے رَلت کیتی، محسن نقوی نے نویاں گڈیاں دیاں چابیاں تے یونیفارم ہائی وے پٹرولنگ پلس دے حوالے کیتیاں۔ایس موقع اُتے خطاب کردیاں ہویاں محسن نقوی دا کہنا سی کہ پنجاب ہائی وے پٹرولنگ پلس نوں313 گڈیاں تے یونیفارم مل گئیاں نیں، ہر جوان تے سینئر افسر نوں2 یونیفارماں دتیاں جان گیاں، پلس دی کارکردگی تے استعداد کار ودھان لئی ساریاں سہولتاں دتیاں جا رہیاں نیں۔اونہاں نے آکھیاکہ پنجاب ہائی وے پلس نوں ایکسل لوڈ چیک کرن دی ذمہ داری سونپی گئی اے، پنجاب وچ750 تھانیاں دی اپ گریڈیشن دا وی پلان مرتب کیتا اے، ساہنوں پلس خدمت مرکزاں سنے تھانہ کلچر وچ وی تبدیلی لیانی اے۔محسن نقوی دا کہنا سی کہ لہور سمن آباد تھانے وچ انساناں دا رہنا مشکل سی، میں آکھیا اے کہ لہور دے10 تھانیاں دی پرپوزل لے کے آن، سب توں پہلی ترجیح عام آدمی نوں تھانے وچ انصاف دینا اے۔وزیراعلی پنجاب نے ہور آکھیاکہ پلس توں درخواست اے کہ عوام نال چنگا سلوک کرن، ساہنوں عام آدمی نوں ریلیف تے انصاف دینا اے۔