اسرائیل دے غزہ اُتے وحشیانہ حملے ، فلسطینی شہیداں دی تعداد 3ہزار ہوگئی
غزہ ( پنجابی میڈیا گروپ) اسرائیل دے غزہ اُتے وحشیانہ حملے جاری نیں ، اسرائیلی بمباری دے نتیجے وچ شہید ہون والے فلسطینیاں دی تعداد 3ہزار تک پہنچ گئی جدکہ بالاں تے عورتاں سنے 9ہزار افراد زخمی ہوئے نیں ۔فلسطین دے علاقے غزہ دی پٹی اُتے مسلط کیتی گئی اسرائیلی جارحیت دے دوران قابض فوج بے رحمی دے نال بم مار رہی اے جس نال نہتے فلسطینیاں دیاں موتاں تیزی نال وَدھ رہیاں نیں۔اسرائیل ہزاراں ٹن بارود غزہ اُتے مار چکیا اے جس وچ سینکڑاں گھر تباہ ہوچکے نیں تے 3 لکھ توں وَدھ فلسطینی بے گھر ہوئے نیں ، ایہی نہیں اسرائیلی فوج نے غزہ توں نقل مکانی کرن والے قافلیاں نوں وی نہیں بخشا ، اسرائیلی طیاریاں دے حملیاں وچ 70 فلسطینی شہید جدکہ سینکڑاں زخمی نیں ۔ یہودی آباد کار وی نہتے فلسطینیاں دا قتل عام کرنے لگے ،پچھلے دناں یہودی آباد کار نے وی اسرائیلی فوج دی موجودگی وچ نہتے فلسطینیاں نوں گولیاں مار کے شہید کیتا۔اسرائیلی فوج نے کل ہفتے نوں غزہ دی پٹی دے کئی علاقیاں اُتے بمباری تیز کردتی جس نال ہسپتال تے صحت دیاں سہولتاں متاثر ہوئیاں، اسرائیلی بمباری وچ ہسپتال وی محفوظ نہیں رہے ، بمباری وچ غزہ دی پٹی دے ہسپتالاں نوں نشانہ بنایا جا رہیا اے۔غزہ دے ہسپتالاں وچ ہیلتھ ریفریجریٹرز لاشاں نال بھر گئے نیں ،جس دے بعد کھان تے آئس کریم دیاں فریجاں نوں جسم دے اعضا تے لاشاں نوں ذخیرہ کرن لئی استعمال کیتا جان لگیا اے۔اوس دے نال نال عالمی ادارہ صحت ڈبلیو ایچ او نے غزہ دے ہسپتالاں توں مریضاں دی بے دخلی نوں سزائے موت دے مترادف قرار دے دتا جدکہ اقوام متحدہ دے ادارے یونیسیف نے اک بیان وچ دسیا اے کہ غزہ وچ ہُن تک اسرائیلی حملیاں دے نتیجے وچ 700بال ہلاک ہوچکے نیں۔
