نوازشریف پاکستانی سر زمین اُتے آزاد حیثیت نال آن گے، محمد زبیر

کراچی(پنجابی میڈیا گروپ)مریم نواز دے ترجمان تے سابق گورنر سندھ محمد زبیر نے آکھیا کہ نوازشریف دی ضمانت منظور ہوچکی اے ہُن اوہ پاکستانی سرزمین اُتے آزاد حیثیت نال آن گے۔سابق گورنر سندھ محمد زبیر نے مسلم لیگ ہائوس وچ پریس کانفرنس کیتی، نوازشریف دی استقبالیہ کمیٹی دے سربراہ بشیر میمن سابق سینیٹر نہال ہاشمی، سابق ایم این اے کھیل داس وی پریس کانفرنس وچ رَلتی سن۔محمد زبیر نے میڈیا نال گل بات کردیاں ہویاں آکھیا کہ نوازشریف دی حفاظتی ضمانت منظور ہو چکی، میاں نوازشریف پاکستانی سرزمین اُتے آزاد حیثیت نال آن گے، نوازشریف دا استقبال فقیدالمثال ہوئے گا، کراچی، حیدرآباد، سکھر توں کارکن ٹرین تے بسوں اُتے قافلے دی صورت وچ لہور جان گے، سندھ دے عوام نوازشریف نال محبت کردی اے۔سابق گورنرنے آکھیا کہ نوازشریف ہفتہ نوں دبئی توں چلن گے، سندھ دا قافلہ سٹی ریلوے سٹیشن توں چلے گا، کینٹ، ڈرگ روڈ تے لانڈھی اُتے رُکے گا، لانڈھی وچ پریس کانفرنس کرن گے، دُوجی ٹرین حیدرآباد توں چلے گی، ساڈھے کارکن نراض نیں، زیادہ لوکاں نوں نہیں لے جاسکدے ساڈھی اک ہفتے دی تیاری نال سندھ دے کونے کونے توں لوگ آرہے نیں، سکھر، شہداد پور تے ہوراں شہراں وچ لوکاں دی وڈھی تعداد ساڈھے نال ہوئے گی۔