سرمایہ کاری وچ کمی، سٹیٹ بینک دی کورونا دے معیشت تے اثرات دی رپورٹ
کراچی: سٹیٹ بینک نے کورونا دے معیشت تے اثرات دی رپورٹ جاری کر دتی جہدے وچ آکھیا گیا کورونا وائرس پاروں تجارت متاثر ہوئی، عالمی معیشت متاثر ہون نال ترسیلات زر وچ وی کمی ہوئی۔
سٹیٹ بینک دی جاری کیتی رپورٹ وچ ہور آکھیا گیا کہ کورونا پاروں سرمایہ کاری وچ کمی آئی، تیل دی گھٹ قیمتاں درآمدی ملکاں نوں فائدہ ہویا، مقامی سطح تے کاروباری سرگرمیاں متاثر ہوئیاں، عوام دی قوت خرید گھٹ گئی، بیرونی سرمایہ کاری وی گھٹ ہو گئی، معاشی سست روی نال محصولات وچ وی کمی ریکارڈ کیتی گئی، رپورٹ وچ آکھیا گیا وباءنوں قابو کرن لئی لاک ڈائون کیتا گیا، لاک ڈائون نال فیکٹریاں تے کاروباری طبقے دا کیش فلو متاثر ہویا، ایہو صورتحال جاری رہی تے کئی کمپنیاں دا دیوالیہ نکل سکدا اے، کمپنیاں دیوالیہ ہون نال بینکاں دی آمدنی متاثر ہووے گی، کاروبار بند ہون نال بیروزگاری وچ وی وادھا ہووے گا، موجودہ صورتحال وچ زرمبادلہ دے ذخائر گھٹ سکدے نیں۔
