اداریاں دی نجکاری وچ سب توں وڈھی رکاوٹ عدالتی حکم امتناع نیں،وزیراعظم

اسلام آباد(پنجابی میڈیا) وزیراعظم شہباز شریف نے اداریاں دی نجکاری دا عمل تیز کرن دا حکم دیندیاں ہویاں نجکاری وچ شامل اداریاں دی فہرست تے پیش رفت رپورٹ منگ لئی۔میڈیا دے مطابق وزیراعظم شہباز شریف دی زیر صدارت نجکاری بارے وزیراعظم ہاوس وچ اعلی سطح اجلاس منعقد ہویا۔ اجلاس وچ سینیٹر اسحاق ڈار، مصدق ملک، شیزہ فاطمہ، رومینہ خورشید عالم، احد چیمہ، علی پرویز ملک، رانا احسان افضل، ڈپٹی چئیرمین پلاننگ کمیشن ڈاکٹر جہانزیب، گورنر اسٹیٹ بینک، چیئرمین ایف بی آر، سیکریٹری نجکاری، سیکریٹری قنون سنے اعلی حکام رَلتی سن۔ ممتاز بینکار محمد اورنگزیب نے وڈیو لنک ذریعے اجلاس وچ رَلت کیتی۔اجلاس وچ پی آئی اے، ہاوس بلڈنگ فنانس کارپوریشن، فرسٹ وومن بینک، روز ویلٹ ہوٹل، ہیوی الیکڑیکل کمپلیکس، بجلی دے کارخانیاں تے تقسیم کار کمپنیاں، پاکستان اسٹیل ملز کارپوریشن سنے خساریاں وچ چلن والے ہور اداریاں دی نجکاری دے عمل اُتے تازہ ترین صورتحال، ہُن تک دی پیش رفت تے حائل رکاوٹاں دا تفصیلی جائزہ لیاگیا۔