سب نوں مل کے ملک نوں مشکل توں کَڈنا ہوئے گا،نوازشریف

لہور(پنجابی میڈیا)پاکستان مسلم لیگ ن دے قائدوسابق وزیراعظم میاں نواز شریف نے آکھیا اے کہ 1،2 سال مشکل سہی، آسودگی دا ویلا ضرور آئے گا، سب نوں مل کے ملک نوں مشکلاں توں کَڈنا ہوئے گا۔قائد مسلم لیگ ن و سابق وزیراعظم نواز شریف تے وزیراعلی پنجاب مریم نواز نال فیصل آباد ڈویژن دے ارکان قومی و صوبائی اسمبلی نے ملاقات کیتی۔ایس موقع اُتے گل بات کر دیاں ہویاں سابق وزیراعظم میاں نواز شریف نے آکھیا کہ فیصل آباد وچ ڈور پھرن نال نوجوان دی ہلاکت دا بوہت دکھ اے، غمزدہ خاندان دے دکھ وچ برابر دے رَلتی نیں۔لیگی قائد دا کہنا سی کہ تہاڈی وزیراعلی تہاڈے نال اے، مل کے صوبے تے ملک لئی کام کرو، سیاستدان، انتظامیہ تے پلس سنے ساریاں نوں مل کے ملک نوں مشکلاں توں کَڈنا ہو ئے گا۔اونہاں نے آکھیا کہ سب مل کے پاکستان نوں دوبارہ اپنے مقام اُتے لیان گے، 1،2 سال مشکل سہی، آسودگی دا ویلا ضرور آئے گا، ساڈھی حکومت نوں نہ ہٹایا جاندا تے پاکستان ترقی دیاں بلندیاں اُتے ہُندا۔سابق وزیراعظم دا ہور کہناسی کہ قبضہ کرن والیاں نے ملک دے نال جو کیتا سب نے ویکھیا، مسلم لیگ ہی نہیں پاکستان دے نالوی زیادتی ہوئی، ن لیگ نوں ہُن اپنی سیاسی میراث حاصل کرنی اے۔