کامیابی اوس دن ہوئے گی جس دِن قرضے توں جان چھٹ جائے گی،وزیراعظم

اسلام آباد(بیورورپورٹ) وزیراعظم محمد شہباز شریف نے آکھیا اے کہ قرض لینا کامیابی نہیں بلکہ کامیابی اوس دن ہوئے گی جس دِن قرضے توں جان چھٹ جائے گی۔آئی ایم ایف دی آخری مالیاتی قسط جاری ہون اُتے اظہار اطمینان کر دیاں ہویاں وزیراعظم نے آکھیا کہ آئی ایم ایف دی 1.1 ارب ڈالر دی آخری قسط ملن نال پاکستان وچ ہور معاشی استحکام آئے گا، اللہ تعالی نے معیشت بہتر بنان دا موقع دتا اے، پوری جان لڑاواں گے، پاکستان نوں معاشی ترقی دلواں گے۔اونہاں نے آکھیا کہ 2016 وچ میرے قائد نواز شریف نے آئی ایم ایف پروگرام مکمل کیتا سی،ایہ ایس بی اے دُوجا پروگرام اے جیہڑا مکمل ہورہیااے، 16 مہینے دی حکومت دوران پاکستان نوں ڈیفالٹ توں بچان وچ آئی ایم ایف نال ایہ معاہدہ اہم ثابت ہویا سی۔وزیراعظم نے آکھیا کہ پاکستان دے معاشی تحفظ لئی تلخ تے مشکل فیصلے کیتے لیکن اونہاں دے ثمرات معاشی استحکام دی صورت سامنے آرہے نیں، ایسی جذبے نال درست پاسے تسلسل نال محنت جاری رہی تے قرض توں نجات تے معاشی خوش حالی دا دور وی چھیتی آئے گا۔