آئی ایم ایف محکمیاں دی گورننس درست کرن دا کہہ رہیا اے،اعظم نذیرتارڑ

اسلام آباد(بیورورپورٹ) وفاقی وزیر قنون اعظم نذیر تارڑنے آکھیا اے کہ ایف بی آر ریفارمزدا ایجنڈا وزیراعظم دی ترجیحات وچ شامل اے، آئی ایم ایف محکمیاں دی گورننس درست کرن دا کہہ رہیا اے۔اسلام آباد وچ وفاقی وزیر اطلاعات عطا تارڑ دے نال پریس کانفرنس کر دیاں ہویاں وفاقی وزیر قنون اعظم نذیر تارڑ دا کہنا سی کہ پاکستان مشکل معاشی بحران توں گزر رہیا اے ، زبانی گل بات کرن نال معاملات حل نہیں ہون گے، وزیر اعطم نے ایف بی آر وچ اصلاح دا بیڑہ چُکیا اے۔اونہاں نے آکھیا کہ آئی ایم ایف کہندااے کہ محکمیاں دی گورننس درست کرو ،بجلی چوری تے ٹیکس چوری روکو، بجلی چوری لائن لاسز نال عام آدمی اُتے بھاری بلاں دا بوجھ پیندا اے،اسیں4 ہفتیاں وچ اصلاح تیار کیتی جنہاں نوں پارلیمنٹ نے منظور کیتا۔اعظم نذیر تارڑ نے آکھیا کہ ایس ویلے 2700ارب دے مقدمے کمشنر لینڈ اینڈ ریونیو تے اعلی عدالتاں وچ زیر التوا نیں، اسیں 50،50ارب لئی بوہت مشکلاں دے نال گزارا کررہے ہاں، انکم ٹیکس نہ دینا تے گھٹ ٹیکس دینا ساڈھا مسئلہ اے جس دی محکمیاں نے نشاندہی کرنی اے۔