سندھ حکومت امن وامان دی بحالی لئی سخت اقدام کر رہی اے،مرادعلی شاہ

کراچی(بیورورپورٹ)وزیراعلی سندھ مراد علی شاہ نے آکھیا اے کہ حکومت سندھ صوبے وچ امن وامان دی بحالی لئی سخت اقدام کر رہی اے۔ ایپکس کمیٹی دے31ویں اجلاس وچ گل بات کر دیاں ہویاں وزیراعلی سندھ مراد علی شاہ نے آکھیا کہ منشیات توں بالاں نوں محفوظ رکھن لئی سکولاں اُتے کڑی نظر رکھن دا فیصلہ کیتا گیا اے ، منشیات دے عادی افراد دی بحالی لئی ادارے قائم کیتے جان، نارکوٹکس ڈپارٹمنٹ ہوراں صوبیاں تے وفاقی اداریاں دے نال مل کے آپریشن تیز کرے۔اونہاں نے آکھیا کہ ایہ اجلاس پچھلے ایپکس کمیٹی دا تسلسل اے، صدرِ مملکت نے امن و امان اُتے پچھلے دن وزیرِ اعلی ہائوس وچ اہم اجلاس کیتا، اونہاں نے کچے وچ ڈاکواں دے سہولت کاراں نوں وی گرفت وچ لیان دی ہدایت کیتی۔مراد علی شاہ نے آکھیا کہ صدر مملکت نے منشیات دے خلاف آپریشن تیز کرن دی ہدایت دتی، اونہاں نے زمیناں اُتے قبصوںنوں ناقابل برداشت قرار دتا، صدر مملکت دے احکامات اُتے سندھ حکومت مکمل عمل کرے گی۔