پرویز الہی دی درخواست ضمانت منتقلی لئی فائل چیف جسٹس نوں ارسال
لہور(پنجابی میڈیا)اینٹی کرپشن دے مقدمے وچ سابق وزیراعلی پنجاب چودھری پرویز الہی دی ضمانت لئی درخواست دُوجی عدالت وچ ٹرانسفر کرن لئی فائل چیف جسٹس نوں گھل دتی گئی۔لہور ہائیکورٹ وچ پرویز الہی دی اینٹی کرپشن دے مقدمے وچ درخواست ضمانت اُتے سماعت ہوئی، جسٹس شہرام سرور چودھری نے پرویز الہی دی درخواست اُتے سماعت کیتی۔دوران سماعت سرکاری وکیل نے موقف اختیار کیتا کہ ایس مقدمے وچ ہور ملزماں دی ضمانت لئی درخواست اُتے جسٹس سلطان تنویر احمد نے سماعت کیتی سی، ایہ متفقہ قنون اے کہ اوہی جج پرویز الہی دی ضمانت اُتے وی سماعت کرن۔ایڈیشنل پراسیکیوٹر جنرل نے آکھیا کہ پرویز الہی دے وکیلاںنوں چاہندے سن کہ اوس چیز دی پہلاں ہی نشاندہی کر دیندے۔بعد وچ عدالت نے کیس جسٹس سلطان تنویر احمد دی عدالت وچ ٹرانسفر کرن لئی فائل چیف جسٹس لہور ہائیکورٹ نوں گھلدیاں ہویاں کیس دی ہور سماعت اگلے ہفتے تک ملتوی کردتی۔
