کنک دی سرکاری خریداری وچ لیٹ پاروں کسان تنظیماں دااحتجاج دا فیصلہ
لہور(پنجابی میڈیا)پنجاب وچ کنک دی سرکاری خریداری وچ لیٹ پاروں کسان تنظیماں نے مل کے احتجاج کرن دا فیصلہ کر لیا۔کھوکھر گروپ دے سوا کسان اتحاد دے سارے گروپ مل کے جدوجہد کرن اُتے متفق ہوگئے،کسان بورڈ نے وی احتجاج وچ رَلت دا فیصلہ کیتا اے۔چیئرمین پاکستان کسان اتحاد خالد حسین باٹھ نے آکھیا کہ کل لائحہ عمل دا اعلان کیتا جائے گا، احتجاج دے دوران ساریاں شاہراہاں نوں بند کرن گے، جلوساں وچ کساناں دے بال وی رَلتی ہون گے۔دُوجے پاسے ذرائع مطابق فلور ملز سیڈ تے فیڈ ملز نے خریداری شروع کر دتی، فلور ملاں دا10 لکھ ٹن کنک خریدن دا ہدف اے۔ذرائع مطابق سیڈ ملاں نے 6 لکھ ٹن دا ہدف رکھیا اے، ایس سال حکومت ولوں اوپن پالیسی دا فائدہ چُکیا جائے گا، پہلی وار حکومت دی بجائے پرائیویٹ سیکٹر کھل کے کنک خرید رہیا اے۔
