عمران خان داملکی حالات اُتے آرمی چیف نوں خط لکھن دا فیصلہ

راولپنڈی(بیورورپورٹ) بانی چیئرمین پی ٹی آئی نے ملکی حالات اُتے آرمی چیف نوںخط لکھن دا فیصلہ کرلیا۔عمران خان نے اڈیالہ جیل وچ میڈیا نال گل بات کر دیاں ہویاں آکھیا کہ شیر افضل مروت نے پارٹی لئی زبردست کم کیتا، اوس نوں کئی وار سمجھایا پارٹی پالیسی دی خلاف ورزی نہ کرے۔اونہاں نے آکھیا کہ سیاسی جماعت وچ دائرے اندررہ کے کم کرنا ہندا اے، جنگ باہر والیاں نال ہندی اے پارٹی وچ لڑائی نہیں ہندی، لیکن شیر افضل ہر دُوجے دن کسی نہ کسی پارٹی لیڈر اُتے چڑھائی کر دیندا سی، کوئی پارٹی ڈسپلن وچ رہے تے ٹھیک خلاف ورزی کرے تے پورس داہاتھی بن جاندا اے۔بانی پی ٹی آئی نے آکھیا کہ سعودی وفد دے دورہ اُتے شیر افضل مروت نے متنازعہ بیان دتا، جدکہ محمد بن سلمان نے میرے کہن اُتے 2وار او آئی سی کانفرنس کروائی۔عمران خان دا کہنا سی کہ شیر افضل مروت نے پارٹی لئی بوہت کم کیتا لیکن اونہاں نوں پارٹی پالیسی دی بار بار خلاف ورزی نہیں کرنی چا ہیدی ،اوہ اجے وی پارٹی پالیسی مطابق چلے تے کوئی ایشو نہیں اے، اوس نوں نوٹس جاری کیتا اے جواب دین گے تے ٹھیک اے۔عمران خان نے آکھیا کہ 190 ملین پانڈ معاہدہ نوں خفیہ رکھنا پراپرٹی ٹائیکون تے نیشنل کرائم ایجنسی دی ڈیمانڈ وی، برطانیہ وچ پیسے منی لانڈرنگ نہیں بلکہ مشکوک ٹرانزیکشن پاروں پھڑے گئے سن ، سول عدالت وچ کیس چلدا تے ہور 5ورھے تک پیسے پاکستان نہیں آسکدے، بیرون ملک عدالتاں وچ مختلف کیساں وچ پاکستان دے پہلے ہی 100 ملین ڈالر ضائع ہو چکے، 190 ملین پائونڈ بارے انکوائری نیب وچ بند کیتی جاچکی سی جیہڑی 2ورھے بعد دوبارہ کھولی گئی، سپریم کورٹ دے اکانٹ وچ جیہڑے 35 ارب روپے آئے اوس اُتے 13 ارب دامنافع وی بن چکیا اے، بنجر زمین اُتے القادر ٹرسٹ یونیورسٹی بنائی جیہڑی بالاں نوں مفت تعلیم دے رہی اے۔اونہاں دا کہنا سی کہ نواز شریف نے توشہ خانہ توں6 لکھ روپے وچ بلٹ پروف گڈی خریدی اوس نوں بری کرن دا سوچیا جا رہیا اے، زرداری نے توشہ خانہ توں 3گڈیاں لئیاںاوہ عدالت توں استثنی منگ رہیا اے، حسن شریف نے 18 ارب روپے دی پراپرٹی ویچی اوس اُتے کوئی گل نہیں کر رہیا، میرے اُتے توشہ خانہ دا چوتھا کیس چلان جا رہے نیں، زرداری تے نواز شریف ونگوں ملک توں باہر نہیں جاواں گا ، اونہاں دے محل باہر دے ملک وچ ہین اوتھے شاپنگ وی کرنی ہُندی اے۔عمران خان نے زور دتا کہ ملکی حالات اُتے آرمی چیف نوں خط لکھاں گا، پبلک مینڈیٹ مطابق حکومت بنانی پئے گی اوس دے بغیر ملک نہیں چل سکدا، ملک دی ٹیکس کلیکشن 13.3 ٹریلین اے، 9.3 ٹریلین اسیں قرضیاں دے سود دی مد وچ ادا کرنے ہُندے نیں، ایس طرح توں 24 کروڑ آبادی دا ملک کسطرح چلے گا، ملک دی آمدنی وَدھ نہیں رہی سرمایہ کاری لئی کوئی تیار نہیں، بجٹ توں پہلاں بجلی تے گیس دی قیمت ہوروَدھ جائے گی تنخواہ دار طبقہ سڑکاں اُتے ہوئے گا۔بے گناہی ثابت کرن لئی شہزاد اکبر تے فرح گوگی نوںعدالت وچ بلان بارے سوال دے جواب وچ عمران خان نے آکھیا کہ فرح گوگی نال صرف 3 ملاقاتاں ہویاں نیں اوس دا تعلق بشری بی بی نال سی، ایہہ حالات وچ شہزاد اکبر آیا تے اوس نوں ائیرپورٹ توں چُک لیا جائے گا، ملک وچ جنگل دا قنون اے، جنگل دا بادشاہ سب کجھ چلا رہا اے۔بانی پی ٹی آئی نے آکھیا کہ آزاد کشمیر وچ جو کجھ ہورہیا اے اوس اُتے تشویش اے، ملک وچ جمہوریت ختم ہوچکی اے، پہلاں کشمیر تے فیر گلگت بلتستان وچ ساڈھی حکومت ڈیگی گئی، پہلاں گلگت تے ہُن کشمیر وچ لوگ اپنے حقوق لئی کھڑے ہوچکے نیں، پیش گوئی کررہا ہاں جون تے جولائی وچ اینہاں توں ملک سنبھالا نہیں جائے گا، بجٹ وچ ٹیکس، گیس و بجلی دے بل ودھن اُتے تنخواہ دار طبقہ باہر آجائے گا۔