آرمی چیف توں آکھاں گا فوج تے لوکاں نوں آمنے سامنے نہیں کیتا جاندا،عمران خان
راولپنڈی(بیورورپورٹ)بانی پی ٹی آئی عمران خان نے آکھیا اے کہ آرمی چیف نوں خط اپنی ذات لئی نہیں ملک لئی لکھاں گا، اونہاں نوں دساں گا کہ آزاد کشمیر وچ جوکجھ ہو رہیا اے تے ملک جیتھے جا رہیا اے اوس اُتے ساہنوں سوچنا پئے گا، فوج تے لوکاں نوں آمنے سامنے نہیں کیتا جاندا۔اڈیالہ جیل وچ میڈیا نال گل بات وچ اونہاں نے آکھیا کہ فارم 47 دے بینیفیشری نال جدوں کوئی سوال ہُندا اے تے اوہ حملہ آور ہو جاندے نیں جھوٹ نوں بچان لئی ججاں تے میڈیا اُتے دبا ودھایا جا رہیا اے صدر وزیراعظم تے وزیراعلی پنجاب جھوٹ اُتے بیٹھے نیں، فارم 47 دا بینیفیشری گورنر خیبر پختون خواہ علی امین گنڈاپور اُتے ذاتی حملے کر رہیا اے فارم 47 دے بینیفیشری ہی جسٹس بابر ستار اُتے لفظی حملے کر رہے نیں تے ایس ویلے سب کوشش کررہے نیں کہ مصنوعی جمہوریت نوں چلایا جاسکے۔عمران خان نے آکھیا کہ اسیں پنجاب تے کے پی کی حکومتاں ایجنسیاں دے دبا توں بچن لئی ختم کتیاں، نگران وزیراعظم دے بیان دے بعد ایس حکومت دے کول کیہ جواز اے؟ کاکڑ نے حنیف عباسی نوں طعنہ دے کے شہباز شریف نوں پیغام گھلیا۔بانی پی ٹی آئی نے آکھیا کہ چیف جسٹس اک دبنگ آدمی نیں بلوچستان وچ کنٹرولڈ حکومت بنائی جس نال آزادی دی تحریک ہور تیز ہورہی اے، ساڈھا ایہ سوال اے کہ ساڈھی 9 مئی تے 8 فروری دے حوالے نال پٹیشناں نوں کیوں نہیں سنیا جارہیا؟ ساڈھا ٹرائل وی نواز شریف آصف علی زرداری تے یوسف رضا گیلانی دے ٹرائل ونگوں چلایا جائے اسیں ایہ چا ہندے ہاں کہ ساڈھے ٹرائل دی کارروائی نارمل انداز وچ اگے ودھائی جائے سپریم کورٹ وچ میری پیشی براہ راست نشر نہیں کیتی گئی میں سپریم کورٹ سماعت وچ گل بات کرن لئی بے تاب رہیا اُمید کردا ہاں میری اگلی پیشی نوں براہ راست نشر کیتا جائے گا۔اونہاں نے آکھیا کہ اج اڈیالہ جیل وچ سب غریب قیدی نیں، پرویز الہی تے شاہ محمود قریشی اج تحریک انصاف چھڈن دا اعلان کرن جیل دے دروازے کھول دتے جان گے، اونہاں نال کیہ مذاکرات کرئیے جنہاں دے کول پاور ہی نہیں۔صحافی نے سوال کیتا کہ بشری بی بی نے میڈیکل ٹیسٹ نہیں کرائے؟ ایس اُتے اونہاں آکھیا کہ اسیں ایہ موقف اپنایا کہ تُسی خون دے 2نمونے لوو اک پمز تے دُوجا شوکت خانم نوں گھلو، مینوں پمز دی رپورٹاں اُتے اعتماد نہیں اے، پمز والیاں نے پہلاں میرے خون توں کوکین نکلن دی رپورٹ دتی سی جس اُتے میرا ہرجانے دا کیس چل رہیا اے، بشری بی بی نے وی آکھیا کہ خون دے نمونے دوناں لیباٹریاں وچ گھلے جان میڈیکل عملے نے انکار کیتا جس اُتے بشری بی بی نے وی خون دے سیملز نہیں د تے۔عمران خان نے آکھیا کہ آرمی چیف نوں خط اپنی ذات لئی نہیں ملک لئی لکھاں گا، وکیلاں نوں ہدایت دتی اے اوہ خط تیار کر کے مینوں دسن گے، خط وچ دساں گا کہ آزاد کشمیر وچ جوکجھ ہو رہیا اے تے ملک جیتھے جا رہیا اے اوس اُتے ساہنوں سوچنا پئے گا، فوج تے لوکاں نوں آمنے سامنے نہیں کیتا جاندا۔بانی پی ٹی آئی نے ہورآکھیا کہ مس کنڈکٹ اُتے جج ابو الحسنات تے جج قدرت اللہ خلاف ریفرنس فائل کرن دا آکھیا اے۔
