عمران خان دی ملکی بنیاداں کھوکھلی کرن دی ساریاں سازشاں نکام ہون گیاں،عطا اللہ تارڑ

اسلام آباد(بیورورپورٹ)وفاقی وزیر اطلاعات و نشریات عطا اللہ تارڑ نے آکھیا اے کہ بانی پی ٹی آئی ملک دی بنیاداں کھوکھلی کرنا چاہندے نیں، اونہاں دی کوئی سازش کامیاب نہیں ہوئے گی۔اسلام آباد وچ پریس کانفرنس کر دیاں ہویاں وفاقی وزیر عطا اللہ تارڑ دا کہنا سی کہ ساہنوں امداد نہیں، تجارت تے سرمایہ کاری چاہیدی، وزیراعظم جیتھے وی جان ایہی کہندے نیں اسیںکشکول توڑنا چا ہندے ہاں، وزیراعظم باہر دے ملک جا کے کہندے نیں ساہنوں سرمایہ کاری چا ہیدی اے۔اونہاں نے آکھیا کہ ایس آئی ایف سی تحت عالمی سرمایہ کاراں لئی7ڈیسک قائم ہون گے، چائنہ، یو اے ای، سعودی عرب، قطر، یورپی یونین، امریکا تے فارایسٹ نوں شامل کیتا گیا اے، اینہاں ساریاں ڈیسک توں بوہت مدد ملے گی تے سرمایہ کاری نوں ودھاملے گا، تہانوں نظر آئے گا چھیتی معاہدیاں اُتے دستخط ہون گے تے سرمایہ کاری آئے گی۔