ملک وچ ایل پی جی دی قیمت ہور گھٹ گئی، ایس ہفتے ہور سستی ہوئے گی

لہور(پنجابی میڈیا) ملک وچ ایل پی جی دی قیمت گھٹ گئی، جس دے بعد اگلے ہفتے وی ایل پی جی ہور سستی ہون دا امکان اے۔چیئرمین ایل پی جی ڈسٹری بیوٹرز ایسوسی ایشن عرفان کھوکھر مطابق ایل پی جی دے لوکل ڈسٹری بیوٹرز تے امپورٹرز دے وچکار لڑائی پاروں قیمت 60 توں 70 روپے گھٹ ہو کے 250 روپے توں 180 روپے فی کلو اُتے آ گئی اے۔اونہاں نے آکھیا کہ درآمد شدہ ایل پی جی دے 3 جہاز کراچی پورٹ اُتے پہنچدیاں ہی او جی ڈی سی ایل نے پیداواری لاگت گھٹ کر دتی اے تے ایل پی جی دا اک ہور جہاز 2،3دناں وچ پاکستان پہنچ جائے گا ، جس دے بعد قیمت ہور گھٹ جائے گی۔عرفان کھوکھر نے آکھیا کہ اوگرا نے ایل پی جی دی قیمت 238 روپے مقررہ کیتی سی مگر مافیا 240 توں 250 روپے فی کلو فروخت کر رہیا سی ۔ ایل پی جی مافیا دی بلیک میلنگ اُتے اوگرا تے ہور حکومتی ادارے وی خموش تماشائی بنے رہے۔