9 مئی دے مجرماں نوں انصاف دے کٹہرے وچ کھڑا کرنا لازمی اے،فارمیشن کمانڈرز

راولپنڈی(بیورورپورٹ)ملک دی عسکری قیادت نے فارمیشن کمانڈرز کانفرنس وچ 9 مئی دے منصوبہ سازاں، مجرماں تے سہولت کاراں نوں انصاف دے کٹہرے وچ کھڑا کرن دا مطالبہ کر دتا۔پاک فوج دے شعبہ تعلقات عامہ (آئی ایس پی آر)مطابق آرمی چیف جنرل عاصم منیر دی زیر صدارت 83 ویں فارمیشن کمانڈرز کانفرنس ہوئی جس وچ کور کمانڈرز، پرنسپل سٹاف آفیسرز تے پاک فوج دے ساریاں فارمیشن کمانڈراں رَلت کیتی۔آرمی چیف جنرل عاصم منیر دی زیر صدارت فارمیشن کمانڈرز کانفرنس وچ شہیداں دے ایصال ثواب لئی فاتحہ خوانی کیتی گئی، ملک دی حفاظت لئی مسلح فوجی افسراں تے جواناں نوں خراج عقیدت پیش کیتا گیا جدکہ فورم نے افغانستان دی سرحد پار توں مسلسل خلاف ورزیاں اُتے تحفظات وی ظاہر کیتا۔آئی ایس پی آر مطابق کانفرس دے دوران فورم نوںجیو اسٹریٹجک حالات، قومی سلامتی لئی اُبھر دے ہوئے چیلنجاں اُتے بریفنگ دتی گئی جدکہ فورم نوں ملٹی ڈومین خطریاں توں نمٹن لئی پاک فوج دی حکمت عملی بارے وچ آگاہ کیتا گیا۔ایسی طرح کانفرنس دے رَلتیاںنوں پاک فوج نوں جدید بنان دے اقداماں اُتے بریفنگ دتی گئی جدکہ فورم نوں فیلڈ فارمیشنز لئی لاجسٹک سپورٹ نوں بہتر بنان لئی نویں تکنیکی تخلیقات بارے وچ وی دسیا گیا۔فورم نے افغانستان دی سرحد پار توں مسلسل خلاف ورزیاں تے افغان سرزمین نوں استعمال کر دیاں ہویاں اَتگردی دی منصوبہ بندی اُتے سخت تحفظات ظاہر کیتا۔فورم نے کانفرنس وچ آکھیا اے کہ پاکستان دے دشمن پاکستان دے اندر سکیورٹی فورسز تے معصوم شہریاں نوں نشانہ بنان لئی افغانستان نوںاستعمال کر رہے نیںآئی ایس پی آر ولوں آکھیا گیا اے کہ کانفرنس دوران فورم نے بھارت وچ سیاسی مقصد لئی ودھ دیاں ہو یاں فاشزم اُتے اقلیتاں بالخصوص مسلماناں دے نال انسانیت سوز سلوک اُتے تشویش ظاہر کیتی۔فورم نے فلسطینی عوام دے نال مکمل یکجہتی ظاہر کیتی تے غزہ وچ انسانی حقوق دی سنگین خلاف ورزیاں تے جنگی جرائم دی مذمت کیتی جدکہ فورم نے غزہ پٹی دے اندر رفح آپریشن تے ہورساریاں آپریشناںنوں روکن دے عالمی عدالت انصاف دے فیصلے دی حمایت وی کیتی۔پاک فوج دے شعبہ تعلقات عامہ مطابق آرمی چیف نے مختلف مشقاں دے دوران فارمیشنز دی اعلی و معیاری تربیت نوں سراہیا جدکہ جنرل سید عاصم منیر نے انسداد دہشتگردی دی کارروائیاں وچ افسراں تے جواناں دی شاندار کارکردگی نوں وی سراہیا۔آرمی چیف نے فارمیشنز دے اُچے حوصلے تے ہر ویلے آپریشنل تیاریاں نوں وی سراہیا جدکہ کانفرنس نے حاضر سروس، ریٹائرڈ افسراں تے جواناں دی تربیت، فلاح و بہبود لئی فوجی سطح اُتے کیتے جان والے اقداماں اُتے مکمل اطمینان ظاہر کیتا۔فورم نے یوم تکبیر اُتے پاکستان ولوں حاصل کیتے گئے اہم سنگ میل تے خطے اُتے اوس دے مستحکم اثرات نوں سراہیا تے آکھیا کہ ملک دی سلامتی تے استحکام نوں درپیش ساریاں خطریاں نوں قابل فخر قوم دی مکمل حمایت نال نکام بنا دتا جائے گا۔فورم نے اَت گردی خلاف جنگ وچ نویں ضم شدہ ضلعیاں دے عوام دی بیش بہا قربانیاں دااعتراف کیتا تے اَت گردی نوں فیصلہ کن شکست دین لئی نویں ضم شدہ ضلعیاںدی ترقی دی اہمیت اُتے وی زور دتا۔کانفرنس دے دوران فورم نے بلوچستان وچ سماجی و اقتصادی ترقی دی لوڑ اُتے وی زور دتا تے آکھیا کہ سماجی و اقتصادی ترقی نال ہی بیرونی طور اُتے پروپیگنڈا کرن والیاں دا مقابلہ کیتا جا سکے گا۔فارمیشن کمانڈرز نے پائیدار اقتصادی ترقی لئی حمایت دے عزم دا اظہار کیتا تے غیر قنونی سرگرمیاں روکن وچ بشمول سمگلنگ، ذخیرہ اندوزی، بجلی چوری نوں روکن دی کوششاں وچ تعاون دا عزم کیتا۔فورم نے ون ڈاکیومنٹ رجیم، غیر قنونی و غیر ملکی تارکین دی باعزت وطن واپسی دی حمایت ظاہر کیتی تے قومی ڈیٹا بیس دی حفاظت لئی مختلف شعبیاں وچ حکومتی اقداماں دی مکمل حمایت کرن دے عزم دا اظہار کیتا۔آئی ایس پی آر مطابق فورم نے مشرقی سرحد اُتے موجودہ صورتحال دا وی جائزہ لیا، فورم نے مقبوضہ جموں و کشمیر وچ معصوم کشمیریاں دے ماورائے عدالت قتل دے تازہ ترین واقعات دا جائزہ لیا تے سلامتی کونسل دی قرارداداںمطابق حق خودارادیت لئی کشمیریاںدی منصفانہ جدوجہد وچ مکمل یکجہتی ظاہر کیتی۔فورم نے کانفرنس نال اظہار خیال کر دیاں ہویاں آکھیا کہ قنون دی عمل داری نوں قائم کرن تے9 مئی دے مجرماں خلاف فوری تے شفاف عدالتی کارروائی کیتیوں بغیر ملک ایسے سازشی عناصر ہتھوں ہمیشہ یرغمال رہے گا۔کانفرنس دے رَِلتیاں نے آکھیا اے کہ قوم جھوٹ تے پروپیگنڈا کرن والیاں دے مذموم تے مکروہ عزائم توں پوری طرح باخبر اے، اینہاں ناپاک قوتاں دے مذموم ارادیاںنوں مکمل تے یقینی شکست دتی جائے گی، ملک دے وسیع تر مفاد وچ لازمی اے کہ 9 مئی دے منصوبہ سازاں، مجرماں، حوصلہ افزائی تے سہولت کاراںنوں انصاف دے کٹہرے وچ کھڑا کیتا جائے۔رَلتیاں نے ہور آکھیا کہ ریاستی اداریاں بالخصوص فوج دے خلاف ڈیجیٹل اَت گردی مذموم سیاسی مقصد لئی بیرونی سہولت کاراں دی مدد دے نال کیتی جا رہی اے، اوس دا مقصد جھوٹ تے پروپیگنڈا ذریعے پاکستانی قوم وچ مایوسی پیدا کرنا اے، ڈیجیٹل اَت گردی دا مقصد قومی اداریاں بالخصوص پاکستانی فوج تے عوام دے وچکار خلیج پانا اے۔پروپیگنڈا کرن والیاں دی پشت پناہی غیر ملکی سپانسرڈ پراکسیاں ذریعے کیتی جا ندی اے، ایس دا مقصد بلوچستان دے نوجواناں نوں امن وترقی توں دور رکھنا اے۔