کساناں توں کنک نہ خریدن اُتے لہور ہائیکورٹ نے پنجاب حکومت توں جواب منگ لیا

لہور(پنجابی میڈیا)لہور ہائیکورٹ نے کساناں توں کنک نہ خریدن تے باردانہ دی عدم فراہمی اُتے پنجاب حکومت توں جواب منگ لیا۔لہور ہائیکورٹ دے جسٹس شاہد کریم نے ایڈووکیٹ فرحت منظور چانڈیو دی درخواست اُتے سماعت کیتی، درخواست وچ چیف سیکرٹری پنجاب سنے ہوراں نوں فریق بنایا گیا اے۔پنجاب حکومت ولوں اسسٹنٹ ایڈووکیٹ جنرل حسن اعجاز چیمہ عدالت وچ پیش ہوئے۔درخواست گزار نے موقف اپنایا کہ حکومت نے 3900 روپے فی من کنک خریدن لئی پالیسی جاری کیتی، کساناں نوں ویلے اُتے باردانہ فراہم نہیں کیتا جا رہیا، حکومت نے 22 اپریل نوں کساناں توں کنک خریدنی شروع کرنا سی۔درخواست وچ آکھیا گیا کہ حکومت نے اپنی پالیسی مطابق کساناں توں کنک خریدنی شروع نہیں کیتی، بارشاں پاروں کسان سستے ریٹ کنک مافیاز نوں ویچن اُتے مجبور نیی۔درخواست گزار نے استدعا کیتی کہ عدالت حکومت نوں فوری سرکاری ریٹ اُتے کساناں توں کنک خریدن تے کساناں نوں باردانہ فراہم کرن دا حکم دیوے۔