خیبرپختونخوا وچ سینیٹ الیکشن کَدون ہون گے، الیکشن کمیشن توں تریخ منگ لئی گئی

پشور(بیورورپورٹ)پشور ہائی کورٹ نے خیبرپختونخوا وچ سینیٹ الیکشن بارے الیکشن کمیشن توں واضح جواب منگ لیا تے اگلی سماعت اُتے الیکشن دی تریخ دین دا حکم دے دتا۔خیبرپختونخوا وچ سینیٹ الیکشن ملتوی کرن دے خلاف پی ٹی آئی رہنما اعظم سواتی ولوں پشور ہائی کورٹ وچ دائر درخواست اُتے سماعت ہوئی۔درخواست گزار دے وکیل علی زمان ایڈووکیٹ نے آکھیا کہ سینیٹ الیکشن خیبرپختونخوا وچ اجے تک نہیں ہویا، سادھی استدعا اے کہ سینیٹ الیکشن چھیتی کرایا جائے۔وکیل الیکشن کمیشن محسن کامران نے آکھیا کہ سپریم کورٹ وچ 2کیساں زیرسماعت نیں اک مخصوص نشستاں والا تے دُوجا حلف برداری دا اے۔جسٹس وقار احمد نے آکھیا کہ کیا اوس ویلے تک تُسی سینیٹ دا الیکشن نہیں کرائو گے؟ اوس نال تے صوبے دی عوام دے حقوق متاثر ہورہے نیں، سینیٹ وچ ایس صوبے دی نمائندگی نہیں اے،تُسی ساہنوں دَس دیو کہ الیکشن کَدوں کرارہے نیں؟وکیل الیکشن کمیشن نے آکھیا کہ اسیں تے تیار ہاں الیکشن کران لئی لیکن سپریم کورٹ نے مخصوص نشستاں اُتے منتخب ممبراں توں حلف لین بارے ہائی کورٹ دا جیہڑا فیصلہ اے اوس نوں معطل کردتا۔وکیل الیکشن کمیشن محسن کامران نے آکھیا کہ ڈی جی لا نال گل ہوئی اے سینیٹ الیکشن بارے اجلاس ہوئے گا جس وچ الیکشن کمیشن سینیٹ الیکشن بارے فیصلہ کرے گا۔عدالت نے الیکشن کمیشن توںآکھیا کہ آئندہ سماعت اُتے کلیئر رپورٹ جمع کران کہ الیکشن کَدوں کران گے۔ بعد وچ عدالت نے سماعت 6 جون تک ملتوی کردتی۔