جاوید ہاشمی دی مولانا فضل الرحمان نال ملاقات، پی ٹی آئی نال مل کے تحریک چلان اُتے گل بات

لہور( پنجابی میڈیا)سینیئرسیاستدان جاوید ہاشمی نے مولانا فضل الرحمان نال ملاقات وچ حکومت مخالف تحریک دی حمایت کرن دی یقین دہانی کروادتی اے۔ترجمان مطابق دوناں رہنماواں دی ملاقات وچ مولانا فضل الرحمان نے جاوید ہاشمی نال پی ٹی آئی دے نال مل کے حکومت خلاف تحریک چلان بارے گل بات کیتی۔ملاقات وچ جاوید ہاشمی نے ممکنہ تحریک وچ مولانا فضل الرحمان نوں اپنی مکمل حمایت دا یقین دلایا۔ایس توں پہلاں مظفر گڑھ وچ جلسے نال خطاب کر دیاں ہویاں مولانا فضل الرحمان نے 8 فروری 2024 نوں ہون والے عام الیکشن دے نتیجے نوں مسترد کر دیاں ہویاںآکھیا کہ حکومتاں بنن گیاں تے صرف عوام دی مرضی نال بنن گیاں۔سربراہ جے یو آئی نے آکھیا ایہ نہیں ہو سکدا کہ تُسی عوام دے حق نال مذاق کردے رہوو، ایہ نہیں ہو سکدا کہ لَت اُتے لَت رکھ کے کہندے رہوو کہ عوام دی کیہ حیثیت اے؟