پی ٹی آئی انٹرا پارٹی الیکشن کروالیندی تے سارے مسائل حل ہو جا ندے،چیف جسٹس

اسلام آباد(بیورورپورٹ)سنی اتحاد کونسل دی مخصوص نشستاں دی اپیلاں اُتے سپریم کورٹ وچ سماعت دوران چیف جسٹس قاضی فائز عیسی نے ریمارکس دتے کہ اسیں تے نہیں آکھیا سی کہ انٹراپارٹی الیکشن نہ کروان،انٹرا پارٹی الیکشن کروا لیندے تے سارے مسئلے حل ہو جا ندے۔چیف جسٹس پاکستان قاضی فائز عیسی دی سربراہی وچ سپریم کورٹ دا فل کورٹ بینچ معاملے دی سماعت کیتی ، جسٹس سید منصور علی شاہ، جسٹس منیب اختر، جسٹس یحیی آفریدی، جسٹس امین الدین خان، جسٹس جمال خان مندوخیل، محمد علی مظہر، عائشہ ملک، اطہر من اللہ، سید حسن اظہر رضوی، شاہد وحید، عرفان سعادت خان تے نعیم اختر افغان فل کورٹ داحصہ نیں۔سنی اتحاد کونسل دے وکیل فیصل صدیقی نے دلائل دیندیاں ہویاں آکھیا کہ کل مینوں کجھ بنیادی قنونی سوال فریم کرن دا آکھیا گیا سی، کل جسٹس جمال مندوخیل دا سوال سی کہ پی ٹی آئی نے بطور جماعت الیکشن کیوں نہیں لڑیا، سلمان اکرم راجا نے اوسے بارے درخواست دتی سی جیہڑی کہ منظور نہیں ہوئی۔چیف جسٹس پاکستان قاضی فائز عیسی نے سنی اتحاد کونسل دے وکیل فیصل صدیقی نوں لارڈ شپ کہن توں منع کر دتا تے آکھیا کہ لارڈ شپ کہن دی لوڑ نہیں، ویلا بچایا جا سکدا اے۔سنی اتحاد کونسل دے وکیل فیصل صدیقی نے دلائل د یندیاں ہویاں آکھیا کہ درخواست گزار سنی اتحاد کونسل نے الیکشن وچ حصہ نہیں لیا، بطور جماعت حصہ نہیں لیا تے آزاد امیدواراں نے الیکشن وچ حصہ لیا، سنی اتحاد کونسل نے شیڈول مطابق مخصوص نشستاں دی لسٹ دتی، الیکشن کمیشن نے درخواست مسترد کر دیاں ہویاں آکھیا کہ سنی اتحاد کونسل نے الیکشن وچ حصہ نہیں لیا۔چیف جسٹس پاکستان قاضی فائز عیسی نے سوال کیتا کہ کیا ساریاں دستاویزاں موجود نیں جیہڑیاں سوالاںبارے نیں؟سنی اتحاد کونسل دے وکیل فیصل صدیقی نے جواب د تا کہ میرے کول سارے سوال نیں، ساریاں دستاویزاں وی عدالت وچ وکھاواں گا، ایس وچ کوئی تنازع نہیں کہ سنی اتحاد کونسل نے الیکشن نہیں لڑے۔چیف جسٹس پاکستان قاضی فائز عیسی نے سوال کیتا کہ تُسی تنازع دی گل کیوں کر رہے او؟ بس کِدھرے الیکشن نہیں لڑیا، فل اسٹاپ، 2 جگہ تُسی پارلیمنٹری پولیٹیکل پارٹی، تریجی جگہ پولیٹیکل پارٹی لکھیا اے، آخری جگہ پارٹی لکھیا، ایس وچ کوئی خاص فرق اے؟سنی اتحاد کونسل دے وکیل فیصل صدیقی نے جواب دتا کہ آرٹیکل 63 اے مطابق پارلیمنٹری پارٹی تے پولیٹیکل پارٹی دادسیا اے، پولیٹکل پارٹی پارلیمانی پولیٹیکل پارٹی ہو سکدی اے۔چیف جسٹس پاکستان قاضی فائز عیسی نے آکھیا کہ آئین پولیٹکل پارٹی تے پارلیمنٹری پولیٹیکل پارٹی وچ فرق کردا اے، تُسی8فروری توں پہلاں کیہ سو؟ سنی اتحاد کونسل دے وکیل فیصل صدیقی نے جواب د تا کہ 8 فروری توں پہلاں اسیں سیاسی جماعت ساں، آزاد امیدوارشامل ہون دے بعد اسیں پارلیمانی جماعت بن گئے۔چیف جسٹس پاکستان قاضی فائز عیسی نے آکھیا کہ کل سنی اتحاد کونسل تے تحریکِ انصاف اک دُوجے سے خلاف وی کھڑے ہو سکدے نیں، سنی اتحاد کونسل دے وکیل فیصل صدیقی نے آکھیا کہ سپریم کورٹ وچ پی ٹی آئی تے سنی اتحاد کونسل دا حریف بنن دے معاملے نال تعلق نہیں۔چیف جسٹس پاکستان قاضی فائز عیسی نے سنی اتحاد کونسل دے وکیل فیصل صدیقی توں آکھیا کہ میں تہاڈے سوالاں توں لفظ پولیٹیکل حذف کردتا اے۔جسٹس اطہر من اللہ نے سوال کیتا کہ کیا ایسا ممکن اے کہ سیاسی جماعت ہوئے بغیر پارلیمانی پارٹی ہوئے؟ جیہڑی وی پارٹی اسمبلی وچ ہوئے گی تے پارلیمانی پارٹی ہی ہوئے گی، ایس موقع اُتے سپریم کورٹ وچ پولیٹیکل پارٹی تے پارلیمانی پارٹی دے لفظاں وچ فرق اُتے دلائل د تے گئے۔سنی اتحاد کونسل دے وکیل فیصل صدیقی نے آکھیا کہ آئین وچ63اے دے علاوہ کِدھرے پارلیمانی پارٹی دا لفظ نہیں ویکھاں گے، آزاد امیدواراوہ اے جیہڑا کسی پارٹی پلیٹ فارم توں الیکشن نہ لڑے۔چیف جسٹس پاکستان قاضی فائز عیسی نے آکھیا کہ جیہڑے امیدوارساڈھے سامنے نہیں جنہاں دی تُسی نمائندگی کر رہے او او تے سب تحریکِ انصاف دے نیں، تحریکِ انصاف دے امیدوار تے تہانوں چھڈ رہے نیں، تہاڈی پارٹی وچ نہیں آ رہے، تحریکِ انصاف دے امیدوار تے فیر آزاد نہ ہوئے۔جسٹس عائشہ ملک نے آکھیا کہ تحریکِ انصاف دے امیدوار انتخابی نشان اُتے الیکشن نہیں لڑ سکدے سن، الیکشن کمیشن نے تحریکِ انصاف دے امیدواراں نوں کس بنیاد اُتے انتخابی نشان دتا؟ الیکشن کمیشن نے تحریکِ انصاف نوں انتخابی نشان دتا تے بطور آزاد امیدوار شناخت دتی۔جسٹس جمال مندوخیل نے آکھیا کہ پارلیمان وچ فیصلے پارلیمانی پارٹی کر دی اے جنہاںنوں منن سے سب پابند ہُندے نیں ، پارلیمانی پارٹی قنونی طور اُتے پارٹی سربراہ دی گل منن دی پابند نہیں ہُندی۔جسٹس منیب اختر نے آکھیا کہ آرٹیکل 51 وچ سیاسی جماعت دا ذکر اے، پارلیمانی پارٹی دا نہیں، آرٹیکل 51 تے مخصوص نشستاں حلف چُکن توں پہلاں دا معاملہ اے، امیدوار حلف لین گے تے پارلیمانی پارٹی وجود وچ آئے گی، پارلیمانی پارٹی دا ذکر اجے غیر متعلقہ اے، مناسب ہوئے گا کہ سیاسی جماعت تے کیس اُتے فوکس کرن۔جسٹس جمال مندوخیل نے آکھیا کہ آزاد امیدوار اوہ ہُندا جیہڑا کسی سیاسی جماعت توں وابستہ نہ ہوئے ۔جسٹس منیب اختر نے آکھیا کہ کاغذاتِ نامزدگی وچ کوئی خود نوں پارٹی امیدوار ظاہر کرے تے ٹکٹ جمع کرائے تے جماعت دا امیدوار تصور ہوئے گا، آزاد امیدواراوہی ہوئے گا جیہڑا بیانِ حلفی دیوے گا کہ کسی سیاسی جماعت نال تعلق نہیں، سنی اتحاد کونسل وچ شامل ہون والیاں نے خود نوں کاغذاتِ نامزدگی وچ تحریکِ انصاف دا امیدوار ظاہر کیتا، کاغذات بطور تحریکِ انصاف دے امیدوار دے منظور ہوئے تے امیدوار منتخب ہو گئے، الیکشن کمیشن دے قنون کیسطرح تحریکِ انصاف دے امیدواراں نوں آزاد قرار دے سکدے نیں؟ انتخابی نشان اک ہوئے یا نہ ہوئے ، ایہ وَِکھ بحث اے لیکن امیدوار پارٹی دے ہی تصور ہون گے۔چیف جسٹس پاکستان قاضی فائز عیسی نے آکھیا کہ ایس حساب نال تے سنی اتحاد کونسل وچ تحریکِ انصاف دے کامیاب امیدوار شامل ہوئے، سیاسی جماعت وچ تے صرف آزاد امیدوار ہی شامل ہو سکدے نیں۔جسٹس منیب اختر نے آکھیا کہ سیاسی جماعت نوں انتخابی نشان توں محروم کرنا تنازع دی وجہ بن گیا، سپریم کورٹ نے انتخابی نشان واپس لین دا فیصلہ برقرار رکھیا سی۔چیف جسٹس پاکستان قاضی فائز عیسی نے سوال کیتا کہ کیا تحریک انصاف یا آزاد امیدواراں نے بیٹ دا انتخابی نشان لین دی درخواست دتی؟ چیلنج کیوں نہیں کیتا اگر بیٹ دا نشان نہ ملیا؟جسٹس عائشہ ملک نے آکھیا کہ کسی نوں نشان ملیا ہویا اے تے اوہ مخصوص نشان کسی ہورنوں نہیں مل سکدا، چیف جسٹس پاکستان قاضی فائز عیسی نے آکھیا کہ چھڈن پارٹی نوں، تُسی بطور آزاد امیدوار بیٹ کیوں نہیں منگیا؟سنی اتحاد کونسل دے وکیل فیصل صدیقی نے جواب دتا کہ سب آزاد امیدوار تے بلا نہیں منگ سکدے، چیف جسٹس پاکستان قاضی فائز عیسی نے آکھیا کہ ہر حلقے دا فارم وَکھ ہُندا اے، کیوں نہیں منگ سکدے؟ دین نہ دین وَکھ گل اے، جسٹس منیب اختر نے آکھیا کہ انتخابی نشان دی الاٹمنٹ توں پہلاں سپریم کورٹ دا فیصلہ آیا سی، قنونی غلطیاں دی پوری سیریز اے جس دا آغازایتھوں ہویا سی۔سنی اتحاد کونسل دے وکیل فیصل صدیقی نے آکھیا کہ سلمان اکرم راجہ نے خودنوں تحریکِ انصاف دا امیدوار قرار دین لئی رجوع کیتا سی، الیکشن کمیشن نے سلمان اکرم راجہ دی درخواست مسترد کر دتی سی۔جسٹس منیب اختر نے آکھیا کہ ہر امیدوار بیلٹ پیپر اُتے تحریکِ انصاف دا امیدوار ہُندا تے سپریم کورٹ دے فیصلے دی خلاف ورزی ہُندی ، جسٹس حسن اظہر رضوی نے استفسار کیتا کہ بلے باز وی کسی سیاسی جماعت دا نشان سی جیہڑا تحریکِ انصاف لینا چا ہندی دی، بلے باز والی جماعت دے نال کیہ ہویا سی؟ سنی اتحاد کونسل دے وکیل فیصل صدیقی نے جواب دتا کہ بلے باز والی جماعت دے نال گل بات ختم کر دتی سی۔چیف جسٹس پاکستان قاضی فائز عیسی نے سوال کیتا کہ کیا سپریم کورٹ دے فیصلے وچ لکھیا اے کہ بلے کا نشان کسی ہور نوں الاٹ نہیں ہو سکدا؟ سنی اتحاد کونسل دے وکیل فیصل صدیقی نے جواب دتا کہ بلے دانشان کسی ہورنوں الاٹ ہون دا سپریم کورٹ دے فیصلے وچ نہیں لکھیا، چیف جسٹس پاکستان قاضی فائز عیسی نے آکھیا کہ تہاڈابوہت شکریہ۔جسٹس منیب اختر نے سنی اتحاد کونسل دے وکیل فیصل صدیقی توں استفسار کیتا کہ کیا سپریم کورٹ نوں ایسا کہن دی لوڑ سی؟سنی اتحاد کونسل دے وکیل فیصل صدیقی نے جواب د تا کہ سپریم کورٹ نوںکہن دی لوڑ نہیں سی کیونکہ نشان کسی ہور نوں نہیں مل سکدا۔جسٹس محمد علی مظہر نے آکھیا کہ سپریم کورٹ وچ کیس انتخابی نشان دا نہیں انٹرا پارٹی الیکشن دا سی، عدالت نے مخصوص نشستاں دے معاملے اُتے آکھیا سی کہ کوئی مسئلہ ہویا تے رجوع کر سکدے نیں۔سنی اتحاد کونسل دے وکیل فیصل صدیقی نے جواب د تاکہ سنی اتحاد کونسل نے مخصوص نشستاں لئی الیکشن توں پہلاں لسٹ نہیں دتی، تحریکِ انصاف نے انتخابی شیڈول توں پہلاں مخصوص نشستاں لئی لسٹ دتی جیہڑی الیکشن کمیشن نے منظور نہیں کیتی۔چیف جسٹس پاکستان قاضی فائز عیسی نے آکھیا کہ کسی ایسے ججمنٹ اُتے کمنٹ کرنا جیہڑے لوگ پڑھنا وی گوارہ نہیں کر سے، مینوں عجیب لگدا اے، سپریم کورٹ لاجک اُتے حلف نہیں لیندی، سپریم کورٹ تحریر، آئین اُتے حلف لیندی اے، فیصلہ ایہ اے کہ لیکن لاجک وَکھ اے، ایسا میں پہلاں نہیں سنیا، اسیں تے نہیں آکھیاسی کہ انٹرا پارٹی الیکشن نہ کران، انٹرا پارٹی الیکشن کرا لیندے سارے مسائل حل ہو جا ندے۔جسٹس اطہر من اللہ نے آکھیا کہ اصل اسٹیک ہولڈر ووٹر اے جیہڑے ساڈھے سامنے نہیں، پی ٹی آئی مسلسل شکایت کر رہی سی کہ لیول پلیئنگ فیلڈ نہیں مل رہی، چیف جسٹس پاکستان قاضی فائز عیسی نے آکھیا کہ لیول پلیئنگ فیلڈ دی شکایت ساڈھے سامنے نہیں اے۔جسٹس اطہر من اللہ نے آکھیا کہ اسیں بنیادی حقوق دے محافظ ہاں، ساہنوں ویکھنا اے کہ ووٹراں دے حقوق دا تحفظ کسطرح ہو سکدا اے، اک جماعت مسلسل شفاف موقع نہ ملن دا کہہ رہی سی تے ایسا پہلی وار نہیں ہویا۔چیف جسٹس پاکستان قاضی فائز عیسی نے سنی اتحاد کونسل دے وکیل فیصل صدیقی توں مخاطب ہو کے آکھیا کہ تہاڈی دشواری ایہ اے کہ تُسی خودنوں تحریکِ انصاف داامیدوار ظاہر کرنا چا ہندے سو، الیکشن کمیشن نے تہانوںآکھیاکہ تحریکِ انصاف نوںبلا نہیں ملیا تے تہانوں نہیں دے سکدے، خود نوں تَد آزاد امیدوار ڈیکلیئر کر دے تے بیٹ منگ لیندے، قنون نے آکھیا کہ اپنی پارٹی وچ الیکشن کرا لین، قنون اسیں نہیں تُسی بنایا اے، میں تہانوں مشورہ ہی دے سکدا ہاں، پہلاں وی دورانِ سماعت مشورے د تے، تہانوں خود نوں تحریکِ انصاف ظاہر کرنا چاہیا، تُسی ہور کجھ نہیں تے بلا دا نشان منگدے تے سہی، ملنا نہ ملنا سپریم کورٹ بعد وچ ویکھدی، تُسی مختلف پارٹی نال منسلک ہونا چاہ رہے او، تُسی ہُن آزاد امیدوار نہیں، الیکشن کمیشن دے فیصلے والے دن ساڈھے کول چیلنج ہُندے نیں، خودنوں پی ٹی آئی دا امیدوار ظاہر کیتا تے بطور آزاد امیدوار نہیں، تُسہ پارٹی نوں ٹھکرا کے آ رہے او۔سنی اتحاد کونسل دے وکیل فیصل صدیقی نے جواب د تا کہ الیکشن کمیشن نے فیصلہ کیتا کہ میں پی ٹی آئی امیدوار نہیں، آزاد امیدوار ہاں۔جسٹس شاہد وحید نے سنی اتحاد کونسل دے وکیل فیصل صدیقی سے استفسار کیتا کہ کیا الیکشن کمیشن دا فیصلہ چیلنج کیتا سی؟ سنی اتحاد کونسل دے وکیل فیصل صدیقی نے جواب د تا کہ الیکشن کمیشن دا فیصلہ چیلنج نہیں کیتا گیا، ایہ حتمی ہو چکیا اے۔جسٹس شاہد وحید نے آکھیا کہ فیصلہ حتمی ہو چکیا اے تے بحث دا کیہ فائدہ؟سنی اتحاد کونسل دے وکیل فیصل صدیقی نے جواب د تا کہ سپریم کورٹ بلے دے نشان والے فیصلے دی وضاحت کر د یندی تے سارے مسائل حل ہو جاندے۔چیف جسٹس پاکستان قاضی فائز عیسی نے آکھیا کہ تحریکِ انصاف انٹرا پارٹی الیکشن کرا لیندی تے اج نشستاں والا مسئلہ ہی نہ ہُندا، سپریم کورٹ اُتے ہر چیز دا ملبہ نہ پائو، تحریکِ انصاف نے جمہوری حق توں اپنے لوکاںنوں محروم رکھیا سی، ایس سیاسی جماعت دے الیکشن وچ ووٹراں دی خواہش دی عکاسی کیتھے ہوئی؟ پارٹی الیکشن ہُندے تے فائدہ تحریکِ انصاف دے ممبراں نوں ہی ہُندا، الیکشن لڑ لیندے، جمہوریت دیگل کرنی اے تے پوری کر ن۔جسٹس اطہر من اللہ نے آکھیا کہ بوہت احترام نال، اگر سب سچ بولنا شروع کرن تے اوہ بوہت کڑوا اے، چیف جسٹس پاکستان قاضی فائز عیسی نے آکھیا کہ میں تے سچ بولدا ہاں، جسٹس محمد علی مظہر نے آکھیا کہ بلے والے فیصلے اُتے نظرِ ثانی لیٹ اے، ساریاں گلاں ایتھے کرنیاں نیں تے اوتھے کیہ کراں گے؟جسٹس منصور علی شاہ نے استفسار کیتاکہ ایوان وچ زیادہ آزاد میدوار ہون تے 2 سیاسی جماعتاں ہون تے کیہ ہوئے گا؟ جسٹس منصور علی شاہ نے آکھیاکہ کیا ساری مخصوص نشستاں 2سیاسی جماعتاں نوں جان گیاں؟ یااونہاں جماعتاں نوں صرف اپنی جتی ہوئی نشستاں دے تناسب نال مخصوص نشستاں ملن گیاں؟ پہلاں ایس تنازعے نوں حل کرن اوس دا کیہ جواب اے؟جسٹس منیب اختر نے آکھیا کہ حقیقی آزاد امیدوار ہون تے اونہاں دے تے مزے ہو جان گے، حقیقی آزاد امیدواراں نوں تے ہور سیاسی جماعتاں لے لیندیاں نیں، اگر ایہ78لوگ سنی اتحاد کونسل وچ شامل نہ ہندے فیر مخصوص نشستاں دا کیہ ہُندا؟جسٹس منصور علی شاہ نے ریمارکس دتے کہ 2 سیاسی جماعتاں اپنی جتیاں نشستاں دے تناسب نال ہی مخصوص نشستاں لین گیاں، باقی نشستاں دا کیہ ہوئے گا بعد وچ ویکھیا جائے گا، ایہ نہیں ہو سکدا کہ اونہاں ہی سیاسی جماعتاںنوں وَدھ نشستاں وی وَنڈ دین، ایسا کرن نال فیر متناسب نمائندگی دا اصول کیتھے جائے گا؟چیف جسٹس نے استفسار کیتاکہ آئین نال دسن ایہ کیتھے اے؟ جس اُتے فیصل صدیقی نے آکھیا کہ ایہ تے ایسے ہی اے آکھیاجائے شوہر شادی شدہ نہیں، چیف جسٹس نے آکھیا کہ آزاد امیدوار سنی اتحاد کونسل وچ نہ جا ندے تے پی ٹی آئی دا کیس چنگا سی، پی ٹی آئی جا کے کہہ سکدی سی ایہ ساڈھے لوگ نیں نشستاں ساہنوں دیو، کس دلیل اُتے پی ٹی آئی دا ایہ موقف مسترد ہُندا، ایہ لوگ سنی اتحاد کونسل وچ نہ جا ندے تے مخصوص نشستاں دا کیہ ہُندا؟ یا تے تُسی کِدھرے ایوان نوں مکمل نہیں کرنا تے گل مک جاند،336 دانمبر پورا ہونا تے فیر نشستاں خالی نہیں چھڈ سکدے۔جسٹس اطہر من اللہ نے آکھیا کہ اگر کوئی وی سیاسی جماعت نشستاں نہ جتے سب آزاد آئیاں تے کیہ ہوئے گا ؟ جس اُتے فیصل صدیقی نے آکھیاکہ ایسی صورت وچ مخصوص نشستاں کسی نوں نہیں ملن گیاں۔جسٹس اطہر من اللہ نے ریمارکس د تے ایس دا مطلب اے کہ سیاسی جماعتاں نوں اپنی جتی سیٹاں دے حساب نال ہی مخصوص نشستاں ملن گیاں، اگر پی ٹی آئی والے سنی اتحاد وچ شامل نہ ہُندے تے کیا مخصوص نشستاں خالی ر ہندیاں؟ تُسی خود کہ چکے او کہ ایوان وچ کوئی نشست خالی نہیں چھڈی جا سکدی، سیاسی جماعتاں نوں کس تناسب نال نشستاں ملن گیاں ایہ آئین وچ کیتھے لکھیا اے؟ جسٹس منصور علی شاہ نے آکھیا کہ حاصل کیتی گئی جنرل نشستاں نال ہی سیاسی جماعت دا تناسب نکلے گا جس اُتے فیصل صدیقی نے جواب د تا کہ ایس ویلے قومی اسمبلی وچ 7ارکان آزاد نیں،7سیٹاں اُتے مخصوص نشست نہیں بن دی۔چیف جسٹس نے آکھیاکہ سنی اتحاد کونسل تے پی ٹی آئی دا منشور اک تے نہیں ناں؟پارلیمانی نظام وچ سیاسی جماعت دی اک اہمیت ہندی اے، آئین نوںویکھنا اے تے پورا ویکھن مکس اینڈ میچ نہیں، جسٹس منصورعلی شاہ نے آکھیا کہ ایس ویلے سنی اتحاد کونسل وچ شامل ہون والے نہیں کہہ رہے کہ اسیں اوس دے منشور توںمتفق نہیں، کسی رجسٹر سیاسی جماعت لئی الیکشن لڑیا ہونا کیوں ضروری اے، آزاد امیدواراںدی شمولیت لئی؟ مینوںاوس دے پیچھے کیہ عقلمندی اے اوہ سمجھ نہیں آ ندی۔چیف جسٹس نے آکھیا کہ میرے توں پچھن تے اوس دے پیچھے معقول وجہ موجود اے، اک جماعت الیکشن وچ حصہ نہیں لیندی تے سیاسی عمل نوں رَد کر دی اے، برا نہ منانا گا مگر تہاڈی جماعت دا میں سنا ہی نہیں ہویا سی، ہو سکدا اے باقی لو کاں نے سنیا ہوئے، لو کاں سامنے آئے تے سہی اونہاں دی نمائندگی تے کرو۔سپریم کورٹ نے کیس دی سماعت 24 جون تک ملتوی کردتی ۔