عدالتی رپورٹنگ اُتے کوئی پابندی نہیں،اسلام آباد ہائیکورٹ

اسلام آباد (بیورورپورٹ)چیف جسٹس اسلام آباد ہائی کورٹ نے عدالتی کارروائی دی رپورٹنگ اُتے پابندی بارے کیس وچ ریمارکس د تے کہ میڈیا عدالتی کارروائی نوں رپورٹ کرسکدا اے ، عدالتی رپورٹنگ اُتے کوئی پابندی نہیں اے۔اسلام آباد ہائیکورٹ وچ عدالتی رپورٹنگ اُتے پابندی خلاف پی ایف یو جے تے اسلام آباد ہائیکورٹ جرنلسٹ ایسوسی ایشن دی درخواست اُتے سماعت ہوئی ، درخواست گزار دے وکیل بیرسٹر عمر اعجازِ گیلانی تے اسلام آباد بار ایسوسی ایشن دے صدر ریاست علی آزاد عدالت وچ پیش ہوئے۔دوران سماعت چیف جسٹس عامر فاروق نے آکھیا کہ عدالتی پابندی رپورٹنگ اُتے نہیں غیر ذمہ دارانہ رپورٹنگ اُتے اے، صرف سنسنی خیز ٹکر چلان اُتے مسئلہ ہندا اے ،پیمرا نے عدالت وچ جواب جمع کروا د تا جس اُتے عدالت نے ایڈیشنل اٹارنی جنرل توں استفسار کیتا کہ کیا وفاقی حکومت دا ایس معاملے نال تعلق اے؟ ایڈیشنل اٹارنی جنرل منور اقبال نے عدالت نوں دسیا کہ ایہ پیمرا دا معاملہ اے وفاقی حکومت دا تعلق نہیں اے ۔بیرسٹر عمر اعجاز گیلانی نے آکھیا کہ پیمرا نے جس قنون دا سہارا لیا اے اوس وچ زیر سماعت مقدے رپورٹ کرن اُتے پابندی نہیں اے۔عدالت نے آئندہ سماعت اُتے حتمی دلائل منگدیاں ہویاں کیس دی سماعت11 جون تک ملتوی کردتی ۔