قوم نوں اک ایسی پارلیمینٹ تے عدلیہ چاہیدی اے جس دی عوام وچ عزت ہوئے،چیف جسٹس

اسلام آباد(بیورورپورٹ) سپریم کورٹ نے توہین عدالت کیس وچ ایم کیو ایم رابطہ کمیٹی دے ڈپٹی کنوینئر تے رکن قومی اسمبلی مصطفی کمال دی فوری معافی دی درخواست مسترد کردتی۔چیف جسٹس قاضی فازعیسی دی سربراہی وچ سپریم کورٹ دے 3رکنی بنچ نے فیصل واوڈا تے مصطفی کمال خلاف توہین عدالت کیس دی سماعت کیتی۔ فیصل واوڈا تے مصطفی کمال عدالت وچ پیش ہوئے۔چیف جسٹس نے پچھیا کیا مصطفی کمال نے فیصل واوڈا توں متاثر ہو کے دُوجے دن پریس کانفرنس کیتی؟مصطفی کمال دے وکیل فروغ نسیم نے جواب دتا کہ ایہ محض اک اتفاق سی۔چیف جسٹس نے پچھیا کہ کیا تُسی لوگ فیصل واڈا توں متاثر نہیں او، بطور آفیسر آف کورٹ دسو تہاڈے مکل نے توہین کیتی یا نہیں؟ فروغ نسیم نے جواب دتا کہ مصطفی کمال نے توہین نہیں کیتی، مصطفی کمال نے ربا دی اپیلاں دے تناظر وچ گل کیتی سی، عدالت غیر مشروط معافی قبول کر دیاں ہویاں توہین عدالت دی کارروائی ختم کردیوے۔چیف جسٹس نے آکھیا کہ جدوں توہین نہیں کیتی تے غیر مشروط معافی کیوں منگ رہے او، ربا دی اپیلاں کیتھے زیر التوا نیں؟فروغ نسیم نے جواب د تا کہ ربا اپیلاں سپریم کورٹ دے شریعت اپیلٹ بینچ سامنے زیر التوا نیں۔چیف جسٹس پاکستان نے آکھیا کہ تکنیکی طور اُتے اوہ اک وَکھ ادارہ اے، پارلیمنٹ تے عدلیہ اپنے اپنے امور دی انجام دہی کرن، اراکان پارلیمنٹ دا حق نہیں کہ اوہ دُوجے آئینی ادارے اُتے تنقید کرن، اگر پاکستان دی خدمت لئی تنقید کرنی اے تے ضرور کرن۔چیف جسٹس نے ریمارکس د تے کہ اگر مصطفی کمال سمجھدے نیں کہ اونہاں نے توہین عدالت نہیں کیتی تے فیر معافی قبول نہیں کراں گے ، تُسی ڈرائنگ روم وچ گل کر دے تے وَکھ گل سی ، اگر پارلیمنٹ وچ گل کردے تے کجھ تحفظ مل جاندا ، تُسی پریس کلب وچ گل کرو تے سارے ٹی وی چینل اوس نوں چلان تے معاملہ وَکھ اے ، قوم نوں اک ایسی پارلیمینٹ تے عدلیہ چا ہیدی اے جس دی عوام وچ عزت ہوئے ۔چیف جسٹس نے فیصل واوڈا توںآکھیا کہ تُسی تاں سینیٹر او سینیٹ تے ایوان بالا ہُندا اے، اوتھے وَدھ سُلجھے ہوئے لوگ ہندے نیں۔چیف جسٹس نے آکھیا کہ اگر کوئی آکھے عدالتاں وچ لیٹ فیصلے ہندے نیں تے منصفانہ تنقید اے، اگر تُسی سمجھدے او کہ توہین نہیں کیتی تے غیر مشروط معافی دی وی لوڑ نہیں ساہنوں قائل کرن نوٹس واپس لیندے ہاں، اک گل مصطفی کمال دی پریس کانفرنس وچ وی لیکن اوس اُتے غیر مشروط معافی منگدے ہاں، دَسن ایس معاملے اُتے دین کیہ کہندا اے، تُسی پریس کلب وچ گل کیتی پبلک وچ بات کرنا تے تنہائی وچ گل کرن وچ فرق اے۔