حکومت نال کیہ مذاکرات کر ئیے اوس دے کول تے اختیار ہی نہیں،عمران خان

راولپنڈی(بیورورپورٹ)بانی پی ٹی آئی عمران خان دا کہنا اے کہ حکومت نال کیہ مذاکرات کر یئے اوس دے کول تے اختیار ہی نہیں، پی ٹی آئی دے حق وچ فیصلہ دین والے ججاں اُتے دبا پایا جارہیا اے، بجٹ نے تنخواہ دار طبقے دی کمر توڑ دتی، پارٹی وچ گروپ بندی کرن والیاں نوں نہیں چھڈاں گا سخت ایکشن لاں گا۔اڈیالہ جیل وچ190ملین پانڈ ریفرنس دی سماعت دے دوران میڈیا نال غیر رسمی گل بات وچ عمران خان دا کہنا سی کہ سرگودھا دے جج نے لہور ہائی کورٹ نوںدسیا کہ کسطرح خفیہ ادارے نے اوس اُتے دبا پایا، اوس جج دے گھر دی گیس کٹ دتی گئی، پی ٹی آئی دے جیہڑے جج نیں اونہاںاُتے دبا پایا جا رہیا اے جیہڑا جج ساہنوں انصاف دین لگدااے اوس نوں پریشرائز کیتا جاندا اے، جیہڑا صحافی پی ٹی آئی دے حق وچ بو لدا اے اوس نوں پھڑ لیا جا ندا اے، رئوف حسن اُتے حملہ کرکے اوس دا منہ کٹ دتا گیا، علی زمان اُتے تشدد کیتا گیا، اینہاں ساریاں معاملیاں وچ خفیہ ادارہ شامل اے۔عمران خان نے آکھیا کہ ساڈھے فوجی تے پلس والے ہر دن شہید ہورہے نیں، آئی ایس آئی دا کم ساہنوں تحفظ دینا اے لیکن اوس توں پی ٹی آئی ختم کرن اُتے لادتا گیااے، چیف جسٹس نوںپیغام اے کہ اوہ ملک وچ قنون دی حکمرانی قائم کروا ن، چیف جسٹس سامنے قنونی دی حکمرانی وچ مداخلت ہو رہی اے، ساڈھا پارٹی دفتر توڑ دتا گیا اے،اونہاں دا کہنا سی کہ قوم سرگودھا دے 1 جج، اسلام آباد ہائیکورٹ دے 6جج تے سپریم کورٹ دے3 ججاں نوں سلام پیش کردی اے اونہاں نے آکھیا کہ بجٹ مطابق ساہنوں 13ہزار ارب روپے دا ریونیو اکٹھا کرنا اے جس وچوں 9 ہزار 8 سو ارب قرض دا سود ادا کرنا اے، بجٹ خسارہ پورا کرن لئی ساہنوں ساڑھے 7 ہزار ارب دا قرض لینا پئے گا، پاکستان تے ڈوب چکیا اے، ایہ ملک صرف سرمایہ کاری نال بچے گا جیہڑی قنونی حکمرانی نال ہی آئے گی کیوں کہ 50 ورھیاں وچ سب توں گھٹ سرمایہ کاری ایس سال آئی۔بانی پی ٹی آئی نے آکھیا کہ ملک دا مستقبل ہنیرے وچ چلا گیا اے، تنخواہ دار طبقے اُتے ٹیکس دا ہور بوجھ وی پا دتا گیا اے، مذاکرات دے معاملے اُتے غلط بیانی نہ کیتی جائے کہ اسیں مذاکرات نہیں چا ہندے، جدون فیصلے اُتوںوڈھے صاحب کرن گے تے فیر اینہاں نال مذاکرات دا کیہ فائدہ؟ جسٹس بندیال دے کہن اُتے پی ڈی ایم نال مذاکرات کیتے تے آکھیا گیا وڈھے صاحب نے فیصلہ کیتا اے جدوں تک بندیال اے الیکشن نہیں ہون گے،سیاست دان ہمیشہ مذاکرات وچ ہی جا ندا اے اسیں مشرف دور وچ وی اوس دے نمائندے نال مذاکرات کیتے لیکن حکومت نال نہیں کیتے۔عمران خان نے آکھیا کہ پارٹی نوں پیغام اے کہ گروپنگ ختم کرکے اکھٹی ہوجائے، ایہ پاکستان دی زندگی تے موت دا فیصلہ اے، ہُن پارٹی وچ جیہڑا گروپنگ کرے گا اوس نوں نہیں چھڈاں گا اوس دے خلاف سخت الیکشن لاں گا۔صحافی نے سوال کیتا خان صاحب تُسی کیہ چا ہندے او کہ اسٹیبلشمنٹ مذاکرات لئی نمائندہ مقرر کرے، تَدہی تُسی مذاکرات کرو گے؟ بانی پی ٹی آئی صحافی دے ایس سوال دا جواب دتے بغیر چلے گئے۔