ہتھیارسُٹن والے کچے دے ڈاکواں نوں قومی دھارے وچ لیایا جائے، صدر مملکت
سکھر( بیورورپورٹ) صدر مملکت آصف علی زرداری نے آکھیا اے کہ کچے وچ ہتھیار سُٹن والے ڈاکوواں نوں قومی دھارے وچ شامل کیتا جائے جدکہ ہوراںخلاف سخت کارروائی عمل وچ لیائی جائے۔تفصیل دے مطابق سکھر وچ صدر آصف علی زرداری دی زیرِ صدارت سندھ وچ سیکیورٹی امن و امان دی صورتحال اُتے اجلاس ہویا جس وچ آئی جی سندھ نے کچے تے صوبے دی سیکیورٹی صورت حال اُتے بریفنگ دتی۔رَلتیاں نال گل بات کر دیاں ہویاں صدر مملکت نے آکھیا کہ ریاست دے سامنے ہتھیار سُٹن اُتے آمادہ کچے دے جرائم پیشہ افراد نوں بتدریج قومی دھارے وچ لیایا جائے جدکہ گھنائونے جرائم وچ ملوث پیشہ ور مجرماں خلاف سخت کارروائی کیتی جائے۔اونہاں نے آکھیا کہ چھوٹے جرائم وچ ملوث افراد دی بحالی کر کے ملک دا ذمہ دار تے کارآمد شہری بنانا چا ہیدا۔صدر مملکت نے کچے دے علاقے وچ لوکاں دی سماجی و اقتصادی حالت بہتر بنان دی لوڑ اُتے زور د یندیاں ہو یاںآکھیا کہ علاقے وچ سڑکاں، صحت و تعلیم دے بنیادی ڈھانچے نوں ترجیحی بنیاداں اُتے بہتر بنایا جائے تے کچے دے علاقے دے قبائلی سرداراں اُتے مشتمل اک قومی جرگہ بلایا جائے جیہڑا امن دے ودھا، سیکورٹی صورتحال بہتر بنان لئی مقامی آبادی نال مذاکرات کرے۔آصف زرداری نے آکھیا کہ قومی جرگہ جرائم روکن ، علاقے نوں ہتھیاراں توں پاک کرن لئی کردار ادا کرے گا۔اجلاس وچ وفاقی وزیر داخلہ محسن نقوی، ایم این اے سید خورشید شاہ، وزیراعلی سید مراد علی شاہ، اسپیکر سندھ اسمبلی ، وفاقی و صوبائی وزرا، رینجرز تے ملٹری حکام وی اجلاس وچ رَلتی ہوئے۔اجلاس وچ صدر مملکت نوں سندھ وچ امن و امان دی صورتحال اُتے بریفنگ دتی گئی جدکہ یکم مئی دے اجلاس دوران دتی گئی ہدایت اُتے عملدرآمد دا وی جائزہ لیا گیا۔
