ملٹری کورٹ بارے اجے تک نوا بینچ نہیں بنایا گیا،اسد قیصر

اسلام آباد(بیورورپورٹ)سنی اتحاد کونسل دے اراکاناں نے پارٹی قیادت تے کارکناں دی رہائی لئی پارلیمنٹ توں سپریم کورٹ پیدل مارچ کیتا تے اونہاں دی رہائی لئی نعرے لائے۔ سنی اتحاد کونسل تے پاکستان تحریک انصاف دے پارلیمنٹیرینز نے بانی پی ٹی آئی عمران خان دی رہائی لئی احتجاج کیتا، ارکان قومی اسمبلی نے پارلیمنٹ توں سپریم کورٹ تک پیدل مارچ کیتا۔احتجاجی مارچ وچ بیرسٹر گوہر، اسد قیصر، علی محمد خان، ریاض فتیانہ، عاطف خان شامل سن، ارکاناں نے بانی پی ٹی آئی نوں رہا کرو دے نعرے لائے، ممبراں ولوں ہتھاں وچ بینرز وی چُکے گئے سن۔مظاہرے وچ گل بات کر دیاں ہوئے چئیرمین پی ٹی آئی بیرسٹر گوہر نے آکھیا کہ جج صاحبان وی اپنے حق لئی سڑکاں اُتے نکل آئے سن، تحریک انصاف دے قید کارکناں تے لیڈر شپ نوں رہا کیتا جائے،ساڈھیاںبہناں تے عورتاں پابند سلاسل نیں اونہاںنوں فوری رہا کیتا جائے۔بیرسٹر گوہر نے آکھیا کہ بانی پی ٹی آئی پاکستان دی مشہور ترین شخصیت نیں، بانی پی ٹی آئی نوں فوری رہا کیتا جائے، 3کروڑ ووٹراں نے صرف عمران خان نوں ووٹ دتا اے۔