متناسب نمائندگی دے اصول توں ہٹ کے نشستاں نہیں دتیاں جا سکدیاں،سپریم کورٹ

اسلام آباد( بیورورپورٹ)مخصوص نشستاں بارے سنی اتحاد کونسل دی درخواستاں اُتے سپریم کورٹ دے فل بنچ دی سماعت دوران جسٹس عائشہ ملک نے ریمارکس د تے کہ متناسب نمائندگی لئی اصول توں ہٹ کے نشستاں نہیں دتیاں جا سکدیاں۔چیف جسٹس قاضی فائز عیسی دی سربراہی وچ سپریم کورٹ دا فل بنچ مخصوص نشستاں بارے سنی اتحاد کونسل ولوں پشور ہائیکورٹ دے فیصلے خلاف اپیلاں اُتے سماعت کر رہیا اے۔سماعت دے شروع اُتے سنی اتحاد کونسل دے وکیل فیصل صدیقی نے دریافت کیتا کہ عدالت نے کجھ سوال پوچھے، ا جے دلائل دیو یا جواب الجواب وچ؟جسٹس قاضی فائز عیسی نے آکھیا کہ چھوٹے دلائل نیں تے اجے دے دیو، وکیل نے دسیا کہ کاغذات نامزدگی وچ چیئرمین حامد رضا دی سنی اتحاد کونسل نال وابستگی ظاہر ہندی اے، سنی اتحاد کونسل دا نشان نہ ملن اُتے چیئرمین نے بطور آزادامیدوار الیکشن لڑے، جمعیت علمائے اسلام (ف) وچ وی اقلیتیاں نوں ممبر شپ نہیں دتی جاندی۔وکیل سنی اتحاد کونسل نے آکھیا کہ مخصوص نشستاں ملن اُتے کنول شوزب ساڈھی امیدوار ہون گیاں، عدالت نے صاحبزادہ حامد رضا دے کاغذات نامزدگی دا پچھیا سی، کاغذات نامزدگی وچ حامد رضا نے وابستگی سنی اتحاد کونسل نال ہی وکھائیسی، غیر مسلم ممبر نہ رکھن والی شق جے یو آئی دے منشور وچ وی اے، لیکن فیر وی مخصوص نشتاں ملیاں۔ وکیل مخدوم علی خان نے آکھیا کہ پی ٹی آئی ارکان آزاد ہو کے سنی اتحاد کونسل وچ چلے گئے، پی ٹی آئی دے 2 ارکاناں نے الیکشن کمیشن نوں آکھیا کہ ساہنوں آزاد ڈکلیئر کیتا جائے۔الیکشن کمیشن دے کول ارکان اسمبلی نوں آزاد ڈکلیئر کرن دااختیار نہیں : جسٹس جمال جسٹس جمال مندوخیل نے آکھیا کہ الیکشن کمیشن دے کول تاں ارکان اسمبلی نوں آزاد ڈکلیئر کرن دا اختیار نہیں، جسٹس اطہر من اللہ نے آکھیا کہ الیکشن کمیشن دی ذمہ داری اے کہ ووٹر دے حق داتحفظ کرے، حقائق سب نوں کھل کے دسنے چا ہیدے۔وکیل مخدوم علی خان نے عدالت نوں دسیا کہ مخصوص نشستاں جمع کروا یاں گئیاں لسٹ دے مطابق ہُندی اے، جسٹس منیب اختر نے آکھیا کہ جنہاں نے خود نوں کاغذات نامزدگی وچ تحریک انصاف دا ظاہر کیتا، اونہاں نے الیکشن کمیشن نے آزادامیدوار کس طرح آکھیا؟ وکیل مخدوم علی خان نے آکھیا کہ آزاد امیدواراں نے پہلاں تحریک انصاف نظریاتی ظاہر کیتا تے فیر کاغذات نامزدگی واپس لے لئے ۔