آپریشن عزم استحکام دے کوئی سیاسی مقصد نہیں، تحفظات دور کراںگے،خواجہ آصف

لہور( پنجابی میڈیا)وزیر دفاع خواجہ آصف نے آکھیا اے کہ آپریشن عزم استحکام دے کوئی سیاسی مقاصد نہیں، سیاسی جماعتاں دے تحفظات دور کراں گے۔ماڈل ٹائون وچ پریس کانفرنس کر دیاں ہویاں وزیر دفاع خواجہ آصف دا کہنا سی کہ میٹنگ دے بعد عزم استحکام آپریشن شروع کرن دا اعلان ہویا اے، عزم استحکام آپریشن نوں ضرب عضب یا ردالفساد نال تشبیہ دتی جارہی اے، پچھلے آپریشنز دی نوعیت مختلف سی مگر مقصد اوہی نیں۔اونہاں نے آکھیا کہ ماضی وچ اَت گردی خلاف آپریشن ہوئے، 2016 وچ اے پی ایس دا واقعہ ہویا فیر نیشنل ایکشن پلان بنایا گیا، ساریاں سیاسی جماعتاں آن بورڈ سن، سب نے نیشنل ایکشن پلان نوں سپورٹ کیتا، آپریشن عزم استحکام وی نیشنل ایکشن پلان دا ہی تسلسل اے۔خواجہ آصف دا کہنا سی کہ ماضی تے اج دی صورتحال وچ بنیادی فرق اے، اج فاٹا داانضمام ہوچکیا اے، ماضی وچ اینہاں علاقیاں اُتے اَت گرداں دا قبضہ ہوچکیا سی، پورے پورے علاقے دن رات لئی نوگوایریاز بن چکے سن، آج ویسی صورتحال نہیں اے، اج ساریاں علاقیاں اُتے ریاست دی رٹ موجود اے۔