فون ٹیپنگ دا کوئی قنون موجود نہیں، جو ہو رہیا اوہ غیر قنونی اے،اسلام آباد ہائیکورٹ

اسلام آباد( بیورورپورٹ آڈیو لیکس کیس وچ اسلام آباد ہائی کورٹ نے ریمارکس دتے نیں کہ فون ٹیپنگ دا کوئی قنون موجود نہیں، جو ہو رہیا اوہ غیر قنونی اے۔اسلام آباد ہائی کورٹ دے جسٹس بابر ستار نے بشری بی بی تے نجم الثاقب دی آڈیو لیکس خلاف درخواستاں اُتے سماعت کیتی۔دوران سماعت ایڈیشنل اٹارنی جنرل منور اقبال دوگل نے عدالت نوں دسیا کہ وزارت داخلہ نے اک ایس او پی جاری کیتا، آئی ایس آئی تے آئی بی براہ راست سروس پرووائیڈرز توں ڈیٹا لے سکدی اے،ہور قنون نافذ کرن والے ادارے لوڑ پین اُتے اینہاں ایجنسیاں توں ڈیٹا لے سکدے نیں۔جسٹس بابر ستار نے ریمارکس دتے کہ ایہ ایس او پی تے اک سیکشن افسر نے جاری کیتا اے، متعلقہ اتھارٹی دا ذکر نہیں، وزارت داخلہ دے کول ایہ اختیار کیہڑا اے؟ کس قنون تحت ایہ ایس او پی جاری کیتا گیا؟ وارنٹ بغیر لائیو لوکیشن کسطرح شیئر کیتی جا سکدی اے؟ حکومت نے کس قنون تحت فیصلہ کیتا کہ ایہ ڈیٹا حاصل کر سکدے نیں۔دوران سماعت اسلام آباد پلس دے وکیل طاہر کاظم عدالت وچ پیش ہوئے تے استدعا کیتی کہ ساہنوں تفتیش دی حد تک سی ڈی آر فراہمی دی اجازت دتی جائے، جس اُتے جسٹس بابر ستار نے ریمارکس د تے کہ ایس بارے میں مناسب آرڈر کردیاں گا۔بعد وچ عدالت نے آڈیو لیکس کیس دی سماعت غیر معینہ مدت تک لئی ملتوی کردتی تے آکھیا کہ آئندہ سماعت دی تریخ تحریری حکم نامے وچ جاری ہوئے گی۔