درست ڈیٹا مستقبل لئی ضروری، عوام نوں ریلیف پہنچان وچ آسانی ہوئے گی،مریم نواز

لہور(پنجابی میڈیا)وزیراعلی پنجاب مریم نواز نے آکھیا اے کہ درست ڈیٹا مستقبل لئی بوہت ضروری اے، درست ڈیٹا نال ضرورت مندنوں دہلیز تک ریلیف پہنچان وچ مشکل پیش نہیں آئے گی۔سوشل اکنامک رجسٹری دی افتتاحی تقریب نال خطاب کر دیاں ہویاں وزیراعلی پنجاب مریم نواز دا کہنا سی کہ منصوبے مکمل ہون اُتے مریم اورنگزیب تے وزارت منصوبہ بندی نوں شاباش دیندی ہاں، جَد میں حلف چُکیا تے رمضان دا مہینہ آگیا سی، اسیں رمضان وچ لوکاں دے دروازے تک رمضان پیکیج پہنچایا۔اونہاں نے آکھیا کہ ساڈے کول لوکاں دا ڈیٹا نہیں سی، شکایتاں ملنیاں شروع ہوگئیاں، جیہڑا نمبر مینوں دتا گیا اوس دے مطابق رمضان پیکیج بنائے، کئی ایڈریس ایسے سن جنہاں دا ساہنوں علم ہی نہیں سی، ڈیٹا وچ فون نمبر پرانے تے غلط سن، پنجاب دی 13 کروڑ آبادی اے،مینوں نہیں معلوم کِنی آبادی سوشل اکنامک کیٹیگری وچ آندی اے۔مریم نواز دا کہنا سی کہ بی آئی ایس پی دے ڈیٹانوں وی اپ ڈیٹ کرن دی لوڑ اے، نادرا تے بی آئی ایس پی دے ڈیٹا نوں ویکھدیاں ہویاں رمضان پیکیج بنایا، ہُن سمجھ آگئی کہ اسیں انفارمیشن تے ڈیٹا دے بغیر فیصلے کردے نیں، ساڈے کول کساناں دا وی پورا مصدقہ ڈیٹا موجود نہیں، ٹیکس توں بچن لئی بوہت سارے کساناں نے 12،12ایکڑ دی رجسٹریشن کرائی ہوئی اے۔