طعنہ دین والے ساڈے ووٹاں نال ہی صدر بنے، بلاول دی حکومت اُتے سخت تنقید توں متعلق رانا ثناء دا ردعمل

بیان دین دی اک حد ہونی چاہیدی، دوجیاں دی عزت تے احترام ہونا چاہیدا، وزیراعظم دے مشیر برائے سیاسی امور

اسلام آباد (بیورورپورٹ) پاکستان پیپلز پارٹی دے چیئرمین بلاول بھٹو دی حکمران مسلم لیگ (ن) اُتے سخت تنقید دے بعد وزیر اعظم دے مشیر رانا ثناء اللہ دا بیان سامنے آ گیا۔ اپنے اک بیان وچ وزیراعظم دے مشیر برائے بین الصوبائی رابطہ تے سیاسی امور رانا ثناء اللہ نے آکھیا کہ بیان دین دی اک حد ہونی چاہیے، دوجیاں دی عزت تے احترام ہونا چاہیدا، جنہاں نوں طعنہ دے رہے نیں، ایہناں ہی دے ووٹاں نال صدر منتخب ہوئے نیں۔ رانا ثناء اللہ نے آکھیا کہ سندھ نوں کوئی نقصان نہیں اپڑے گا، سندھ دا اک بوند وی پانی چوری دا ارادہ نہیں، سندھ حکومت گل کرن نوں تیار اے، ایہ گل وزیراعظم دے نوٹس وچ لیائی گئی اے تے وزیراعظم ایس معاملے تے مناسب فیصلہ کرن گے۔ اوہناں نے آکھیا کہ بلاول نے جلسہ عام نال جہڑی گل کیتی اوہ جوش خطابت وچ کیتی، جوش خطابت وچ بہت ساریاں گلاں ہو جاندیاں نیں، بلاول نے جو کجھ آکھیا ایس اُتے رد عمل دین دی ضرورت نہیں لیکن بیانات اک دائرے وچ ہونے چاہیدے نیں، دوجیاں دی عزت تے احترام ہونا چاہیدا۔ رانا ثناء اللہ دا آکھنا سی کہ پاکستان تحریک انصاف اپنے معاملات بہترکرے، جیل دے عملے نال تعاون کرے، جنہاں لوکاں دا نام فہرست وچ ہو اوہی ملاقات لئی جائون، دیگر رہنما اڈیالہ کیوں اپڑ جاندے نیں؟ یاد رہے کہ پچھلے دناں اک جلسہ عام نال خطابت کردے ہوئے پیپلز پارٹی دے چیئرمین بلاول بھٹو زرداری نے آکھیا سی کہ پانی دی ونڈھ دا مسئلہ وفاق نوں خطرے وچ پا سکدا اے، وفاق کینالز منصوبے نوں واپس لوے ورنہ پیپلز پارٹی حکومت نال نہیں چلے گی۔