پہلا سسٹین ایبل انویسٹمنٹ سکوک بانڈ جاری کرن دا فیصلہ

گروک سٹوریج ڈیم،نائگاج ڈیم تے شگر تھنگ ہائیڈرو پاور پراجیکٹ دی تعمیر لئی جاری کیتا جائیگا

اسلام آباد (بیورورپورٹ) حکومت نے صاف انرجی دے 3 منصوبیاں دی فنانسنگ لئی پاکستان دا پہلا سسٹین ایبل انویسٹمنٹ ایسٹیس بیکڈ سکوک بانڈز جاری کرن دا فیصلہ کر لیا اے۔ ایس سکوک بانڈ دے ذریعے حکومت صاف توانائی دے منصوبیاں لئی مقامی مارکیٹ توں سرمایہ جمع کرے گی، صاف توانائی دے ایہناں منصوبیاں دی تکمیل لئی حکومت نوں 52 ارب روپے دی ضرورت اے۔ بانڈز نویں منظور شدہ سسٹین ایبل انویسٹمنٹ سکوک فریم ورک دے تحت جاری کیتے جائون گے، جس دی منظوری کابینہ نے رواں مہینے ہی دتی اے، وزارت خزانہ دے حکام دے مطابق ایہناں پہلے سکوک دا حجم 30 ارب روپے تک ہو سکدا اے۔ حکام دے مطابق ابتدائی طور تے وزارت خزانہ بلوچستان وچ گروک سٹوریج ڈیم، سندھ وچ نائگاج ڈیم تے اسکردو وچ شگرتھنگ ہائیڈرو پاور پراجیکٹ دی تعمیر لئی فنڈز فراہم کرن دی منصوبہ بندی کر رہی اے۔ ایہ منصوبے پہلے ہی زیر تعمیر نیں تے حکومت نوں کم دی تکمیل لئی ہور 52 ارب روپے درکار ہون گے۔ واضح رہے کہ بلوچستان دے ضلع خاران وچ واقع گروک ڈیم دی لاگت 28 ارب روپے دے لگ بھگ ہو گئی اے، جس دی وجہ کم دی تکمیل وچ تاخیر تے کم دے دائرہ کار وچ وادھا اے، حکومت نوں کم مکمل کرن لئی ہور 5 ارب روپے درکار نیں۔ ایسے طرح سندھ دے خیرپور ناتھن شاہ وچ نائی گج ڈیم دے منصوبے دی لاگت وچ وی نمایاں وادھا ہویا اے تے ایس دا افتتاح پہلی وار 2005 وچ کیتا گیا سی، باقی کم دی تکمیل لئی حکومت نوں 22 ارب روپے درکار نیں۔ حکومت نے شگرتھنگ ہائیڈرو پاور پراجیکٹ دی وی منظوری دے دتی اے تے اسکردو شہر تے ایس دے ملحقہ علاقیاں نوں بجلی فراہم کرن لئی 26 میگاواٹ بجلی پیدا کرن لئی 25 ارب روپے دی فنڈنگ درکار اے۔ وزارت خزانہ دے حکام نے آکھیا کہ گرین سکوک، سوشل سکوک تے سسٹین ایبل سکوک دا اجراء اک منفرد تے قابل عمل فنانسنگ میکانزم پیش کردا اے جہڑا اسلامی مالیاتی اصولاں دے مطابق اے تے موثر منصوبیاں لئی ضروری سرمایہ جمع کردا اے۔