اطالوی شہری مردہ ماں دا روپ بنا کے پنشن لبھن دی کوشش وچ گرفتار
اٹلی وچ اک حیران کن واقعہ اس وقت سامنے آیا جدوں اک شخص اپنی مردہ ماں دا روپ دھار کے پنشن حاصل کرن دی کوشش وچ پکڑیا گیا۔ غیر ملکی میڈیا دے مطابق شمالی اٹلی وچ 57 سالہ شخص نوں اس وقت گرفتار کیتا گیا، جدوں اوہ اپنی وفات پا چکی ماں دا شناختی کارڈ تجدید کراؤن لئی دفتر پہنچیا۔
حکام دے مطابق اس شخص دے بال والے ہاتھ، ٹھوڑی تے گردن نے اہلکاراں نوں شک وچ پا دتا، تے یوں اک سنگین جرم دا پردہ فاش ہو گیا۔ ملزم دی ماں 2022 وچ 82 سال دی عمر وچ فوت ہو چکی سی، پر بیٹے نے اس دی موت دی اطلاع حکام نوں کدے نہ دتی۔
اٹلی وچ شناختی کارڈ تجدید کراون لئی شہری نوں خود دفتر جانا ہوندا اے۔ کارڈ دی میعاد ختم ہون ’تے بیٹے نے وِگ، میک اپ تے ماں دے کپڑے پا کے اس دا روپ اختیار کیتا تے دفتر پہنچ گیا۔ پر اہلکار نے مشکوک حرکات دیکھ کے پولیس نوں اطلاع کر دتی۔
جدوں اس نوں دوبارہ بلایا گیا، تاں سی سی ٹی وی فوٹیج وچ صاف نظر آیا کہ “خاتون” خود گاڑی چلا کے آئی سی—حالانکہ فوت شدہ خاتون دے کول ڈرائیونگ لائسنس ہی نہیں سی۔
پولیس نے اس شخص نوں موقعے ’تے روک لیا۔ بعد وچ گھر دی تلاشی دوران لانڈری روم وچ خاتون دی ممی شدہ لاش ملی، جو سلیپنگ بیگ وچ لپٹی ہوئی سی۔
ملزم خلاف لاش چھپاؤن، ریاست نال دھوکہ دہی تے سرکاری دستاویز وچ جعل سازی دے مقدمے درج کر لیے گئے۔ رپورٹ دے مطابق اٹلی وچ پنشن فراڈ عام اے—کئی بندے مرے ہوئے رشتہ داراں دا روپ دھار کے سالاں تک پنشن وصول کر دے پکڑے جاندے نیں، کیوں کہ اموات دا ریکارڈ تے سرکاری سسٹم اکثر اک دوجے نال ہم آہنگ نہیں ہوندے۔
