کپڑے دھون والی مشین پرانی ہُن انسان دھون والی ‘واشنگ مشین’ وی مارکیٹ وچ آ گئی
کپڑے دھون والی مشین توں بعد جاپان نے ہُن اک ہور نرالی ایجاد سامنے لے آئی اے—ہیومن واشنگ مشین۔ ایہہ مشین انسان نوں اک کیپسول نما پوڈ اندر لٹا کے بالکل کپڑیاں ورگی صفائی کردی اے، تے اس دوران ہلکی موسیقی وی چل دی رہندی اے۔ جاپانی کمپنی “سائنس” نے اعلان کیتا اے کہ اوساکا ورلڈ ایکسپو توں بعد ایہہ ایجاد عام مارکیٹ وچ بھی فروخت لئی پیش کیتی جاوے گی۔
عالمی میڈیا دے مطابق کمپنی دی ترجمان، ساچیکو ما ایکورا، دا کہنا اے کہ اوساکا وچ چھ مہینے تک چلن والی ایکسپو اکتوبر وچ ختم ہوئی، تے اس مشین نے زائرین دی وڈی توجہ حاصل کیتی۔ اس ایکسپو نوں دو کروڑ ستر لکھ توں زائد لوکاں نے ویکھیا۔
ہیومن واشنگ مشین وچ نہاؤن لئی صارف نوں کیپسول جیسے پوڈ اندر لیٹایا جاندا اے تے ڈھکن بند کر دِتا جاندا اے۔ مشین انسان نوں کپڑیاں وانگ صاف تے فریش کردندی اے، البتہ بغیر گھمائے، تے پس منظر وچ میوزک وی چلدا رہندا اے۔
ما ایکورا دے مطابق، ایہہ مشین صرف جسم نئیں بلکہ روح نوں وی سکون دِندی اے تے نہاؤن دوران دل دی دھڑکن سمیت زندگی دیاں ہور نشانیاں نوں مانیٹر وی کردی اے۔
کمپنی دا کہنا اے کہ ایہہ جدید ماڈل اصل وچ 1970 اوساکا ایکسپو وچ پیش ہون والے ماڈل دا ترقی یافتہ ورژن اے۔ کمپنی دے صدر نوں بچپن وچ، دس سال دی عمر وچ، اس ایجاد توں ہی تحریک ملی سی۔
امریکی ریزارٹ کمپنی ولّوں دلچسپی ظاہر ہون توں بعد سائنس کمپنی نے ایہہ مشین تجارتی طور ’تے تیار کرن دا فیصلہ کیتا۔ اوساکا دے اک ہوٹل نے پہلے یونٹ دی خریداری وی کر لئی اے تے جلد مہماناں لئی ایہہ سروس شروع کر دیوے گا۔ ہور خریداراں وچ جاپان دی وڈی الیکٹرانکس ریٹیل چین یامادا دنکی وی شامل اے، جو امید رکھدی اے کہ ایہہ مشین دکاناں وچ ہجوم لے آؤ گی۔
ساچیکو ما ایکورا دا کہنا اے کہ ایہہ مشین نایاب نوعیت دی اے، اس لئی کمپنی صرف پچاس یونٹس تیار کرے گی۔ مقامی میڈیا دے مطابق اس دی قیمت تقریباً 3 لاکھ 85 ہزار ڈالر رکھی گئی اے۔
