لاہور ہائیکورٹ دا 13 سالہ بچہ لے پالک ماں باپ نوں واپس کرن دا حکم
لاہور ہائیکورٹ دے جسٹس فیصل زمان خان نے شہری سید ارشد دی درخواست ’تے 8 صفحیاں اُتے مشتمل فیصلہ جاری کیتا۔
فیصلے وِچ کہیا گیا اے کہ سپریم کورٹ دے فیصلے مطابق بچے دی رائے نوں اہمیت دِتّی جاندی اے۔ بچہ وی اپنے بیان وِچ آکھیا کہ اوہ لے پالک والدین نال رہنا چاہندا اے۔ عدالت نے ایک ہفتہ لئی بچے نوں اصلی والدین کول بھیجیا، پر اگلی پیشی تے بچہ فیر اوہو جیہی گل کر گیا کہ اوہ لے پالک والدین نال ہی جانا چاہندا اے۔
عدالتی فیصلے وِچ کہیا گیا کہ اصولی طور تے بچے دی حوالگی دے کیس وِچ اصلی والدین نوں ترجیح ہوندی اے، پر ایہ وی حقیقت اے کہ بچے دے پیدائش وقت حقیقی والدین نے اپنی مرضی نال اوہ اپنے بھائی (لے پالک والد) نوں دِتّا سی۔ لے پالک والدین نے 13 سال تک اس دی پرورش کیتی تے اوہ انہاں دے نال پلیا بڑھے۔ اک دن اچانک بچے نوں دسیا گیا کہ جِنہاں نال اوہ رہ رہا اے، اوہ اصلی والدین نہیں۔
فیصلے وِچ ایہ وی لکھیا گیا کہ حقیقی والد دیاں 3 شادیاں تے 13 بچے نیں، تے اِنّے وڈے خاندان وِچ 13 سال بعد بچے نوں واپس بھیجنا مناسب نہیں۔ حقیقی والدین وی ایہ ثابت نہ کر سکّے کہ بچے دی پرورش ٹھیک نہیں ہوئی۔ عدالت دے مطابق بچہ جتھے رہ رہا اے، اوہو اس دا اصل ماحول اے۔
عدالت نے آکھیا کہ ایہ کیس بچے دی فلاح توں زیادہ گھریلو جھگڑے دا نتیجہ اے۔ 2022 وِچ سیالکوٹ دی لوئر کورٹ نے بچہ اصلی والدین نوں دے دِتّا سی، جس خلاف لے پالک والدین نے اپیل دائر کیتی۔ ہائیکورٹ نے اوہ فیصلہ کالعدم قرار دے دِتّا۔
فیصلے وِچ ایہ وی کہیا گیا کہ بچے نوں اچانک اجنبی ماحول وِچ پاؤنّا اس دے مفاد وِچ نہیں۔ اصلی والدین چاہن تاں ملاقات لئی گارڈین کورٹ رجوع کر سکدے نیں۔
آخر وِچ عدالت نے حکم دِتّا کہ بچہ فیر لے پالک والدین دے کول رہے گا، کیوں کہ اس دی خواہش تے ذہنی کیفیت سب توں اہم نیں۔
