پاکستان نے برطانیہ نوں عادل راجہ تے شہزاد اکبر دی حوالگی دی درخواست کردتی
اسلام آباد (این این آئی) پاکستان نے برطانیہ توں عادل راجہ تے شہزاد اکبر دی حوالگی دی درخواست کردتی۔ وفاقی وزیر داخلہ محسن نقوی دی برطانوی ہائی کمشنر جین میریٹ نال اہم ملاقات ہوئی جیہدے وچ دو طرفہ تعلقات، سکیورٹی تعاون تے باہمی دلچسپی دے مختلف امور تے تفصیلی تبادلہ خیال کیتا گیا۔ ملاقات وچ برطانیہ وچ غیر قانونی طور تے مقیم پاکستانیاں دی وطن واپسی تے متعلق معاملات تے وی گل بات ہوئی۔ حکومت پاکستان نے شہزاد اکبر تے عادل راجہ دی حوالگی لئی ایکسٹروڈیشن دے باضابطہ کاغذات برطانوی ہائی کمشنر دے حوالے کیتے۔ ایس موقع تے وزیر داخلہ محسن نقوی نے آکھیا کہ دونویں افراد پاکستان وچ مختلف مقدمات وچ مطلوب نیں لہٰذا اوہناں نوں چھیتی پاکستان دے حوالے کیتا جانا ضروری اے۔ اوہناں نے بیرون ملک بیٹھ کے ریاست تے اداریاں دے خلاف پروپیگنڈا کرن والے پاکستانی شہریاں دے خلاف ٹھوس ثبوت وی فراہم کیتے۔ وزیر داخلہ دا آکھنا سی کہ آزادی اظہار دا احترام کیتا جاندا اے پر فیک نیوز ہر ملک لئی اک سنگین مسئلہ اے تے کسے وی ریاست وچ بیرون ملک توں کیتے جا ن والے بے بنیاد الزامات
تے ہرزہ سرائی نوں برداشت نہیں کیتا جاندا۔ اوہناں نے آکھیا کہ پاکستان مخالف پروپیگنڈا کرن والیاں دی واپسی لئی برطانوی تعاون قابل قدر ہووے گا۔
