فلموں ،اسٹیج ڈرامیاں وچ کم کرن دی آفرز موجود نیں ‘ میگھا
لہور(شوبز ڈیسک) مشہور گلوکارہ میگھا نے آکھیا اے کہ مینوں اج وی فلماں تے اسٹیج ڈرامیاں وچ کم کرن لئی پیشکشاں موجود نیں پر گلوکاریوچ مصروف ہون دی وجہ توں اوہناں نوں منظور نہیں کر سکدی، اردو دے نال پنجابی فلمات بنن گیاں تے فیر ای فلم انڈسٹری پائیدار ترقی حاصل کر سکدی اے، ایہ کہنا غلط اے کہ پنجابی فلماں دا زمانہ ختم ہو گیا اے کیونکہ ساڈے پڑوسی ملکاں وچ پنجابی فلماں کامیابی دے ریکارڈ توڑ رہیاں نیں۔ اک انٹرویو وچ میگھا نے آکھیا اے کہ میں دعا گو ہاں کہ پاکستان دی فلم انڈسٹری دوبارہ ترقی کرے تاں جو اوہ سینکڑاں خاندان جو دہائیاں توں ایس نال منسلک نے اوہناں دا روزگار بحال ہو سکے۔ اوہناں نے آکھیا اے کہ میرا دعوی اے کہ جے اسکرپٹ جاندار ہووے تاں فلم کدی نکام نہیں ہو سکدی، اج پڑوسی ملک دی پنجابی فلماں اوہناں دی اردو فلماں توں زیادہ بزنس کر رہیاں نیں، اسیں اُچی منزل حاصل کر کے ہولے ہولے تنزلی ول آئے آں، جے عزم نال محنت کیتی جاوے تاں فلم انڈسٹری نوں دوبارہ پیراں تے کھڑا کرنا کوئی مشکل کم نہیں۔
