قریبی لوک وی حسد کر کے غلط مشورے دے سکدے نیں، کومل عزیز
لہور (سٹی رپورٹر) معروف اداکارہ کومل عزیز نے کہیا اے کہ قریبی لوک وی حسد کر کے غلط مشورے دے سکدے نیں۔ نجی ٹی وی دے پروگرام وچ گل بات کردیاں ہوئیاں اوہناں نے کہیا کہ بعض اوقات انسان نوں سب توں زیادہ نقصان قریبی لوک ای پہنچاندے نیں جو حسد پاروں غلط مشورے دیندے نیں۔ اوہناں دا کہنا سی کہ جویں تسیں ہوندے او، تسیں سمجھدے او دنیا وی انج دی ای اے، ایہ اوہ غلطی اے جو انسان اپنی جوانی وچ کردا اے، تہانوں سمجھنا چاہیدا اے کہ دنیا تہاڈے ورگی نہیں اے۔ اوہناں نے مزید کہیا کہ جس نظر نال تسں اپنے آپ نوں ویکھدے او، ہر کوئی تہانوں انج نہیں ویکھے گا، میں ویکھیا اے کہ کُڑیاں نوں سکھایا جاندا اے کہ مُنڈیاں نال زیادہ گل نہ کرن ، کیونکہ اوہ کُڑیاں نیں۔ اداکارہ نے دسیا کہ کُڑیاں اپنی نوکری ، شادی تے زندگی دے کئی فیصلے دوستاں نال شیئر کر دتیاں نیں، پر کدھی کدھی اوہی دوست حتی کہ بہناں وی حسد وچ غلط مشورہ دے سکدیاں نیں ، ایہ میں گھٹ عمری وچ نہیں سِکھیا سی، پر ہن سمجھ آگیا اے۔کومل عزیز نے مزید کہیا کہ انج دے لوک بہت گھٹ ہوندے نیں جو دوجیاں نوں نیچا نہیں وکھاندے، فضیلہ قیصر اوہناں وچوں اک نیں تے اوہناں ورگے لوک بہت گھٹ ملدے نیں۔
