پی ٹی آئی نال گل بات وچ مکمل ڈیڈلاک اے، رانا ثنا اللہ

بانی پی ٹی آئی 9 مئی تے اپنے بیانات توں لاتعلقی دا اظہار تے معذرت کرن، مشیر وزیر اعظم
اسلام آباد (بیورورپورٹ) پاکستان مسلم لیگ (ن )دے سینئر رہنما تے وزیراعظم دے مشیر برائے سیاسی امور رانا ثنا اللہ نے کہیا اے کہ پی ٹی آئی بطور جماعت تے بانی پی ٹی آئی 9 مئی تے اپنے بیانات توں لاتعلقی دا اظہار کرن تے معذرت کرن، انج دی صورت وچ شاید کوئی رستہ کھلے۔ نجی ٹی وی پروگرام وچ گل بات کردیاں ہوئیاں اوہناں نے کہیا کہ جے بانی پی ٹی آئی اپنے بیانات تے قائم رہندے نیں تے ڈیڈ لاک برقرار رہے گا۔ رانا ثنا اللہ نے کہیا کہ ماضی وچ پی ٹی آئی نال گل بات دی کوشش کیتی گئی ، بانی پی ٹی آئی دے اپنے بیانات دی وجہ توں ڈیڈ لاک دی صورتِ حال پیدا ہوئی۔ اوہناں نے کہیا کہ جے ایہ مستقل معمول بنالواں گے کہ ہر منگل تے جمعرات نوں اڈیالہ دے نیڑے احتجاج کراں گے تے ایس صورت وچ حکومت بانی پی ٹی آئی دی کسے جیل منتقلی دے بارے وچ سوچ سکدی اے۔ اوہناں نے کہیا کہ پی ٹی آئی نے بطور جماعت تے بانی پی ٹی آئی نے ادارے تے براہ راست تنقید کیتی، ادارے دے خلاف گل بات نوں لوک پسند نہیں کرن گے۔ مسلم لیگ (ن) دے رہنما نے کہیا کہ بھارت ساڈا دشمن ملک اے، بانی پی ٹی آئی نے پروپیگنڈے وچ اوہدا ساتھ دتا، پی ٹی آئی نال گل بات دا کوئی طریقہ کار نہیں اپنایا جا سکدا ۔ رانا ثنا اللّٰہ نے کہیاکہ بلاول بھٹو دی سوچ ہمیشہ سیاسی تے جمہوری حوالے نال واضح رہی اے، اوہناں نے ہمیشہ افہام و تفہیم دی گل کیتی اے۔ اوہناں نے کہیا کہ اسیں چاہندے سی کہ تمام سیاسی جماعتاں نال گل بات ہونی چاہیدی اے، ڈی جی آئی ایس پی آر آپ کہہ چکے کہ سیاسی جماعتاں آپس وچ گل کرن۔