پاکستان دا افغانستان وچ موجود ٹی ٹی پی دہشت گرداں دے خلاف کارروائی دا عندیہ
6 ہزار جنگجوؤاں تے مشتمل ٹی ٹی پی جنگجو افغانستان وچ موجود ، طالبان نے ٹی ٹی پی دے خلاف کارروائی نہ کیتی تے پاکستان کریگا، عاصم افتخار
نیویارک (مانیٹرنگ ڈیسک) اقوام متحدہ وچ پاکستان دے مستقل مندوب عاصم افتخار نے افغانستان وچ موجود ٹی ٹی پی دہشتگرداں دے خلاف کارروائی دا عندیہ دے دتا۔ اقوام متحدہ وچ پاکستان دے مستقل مندوب عاصم افتخار نے اظہار خیال کردیاں ہوئیاں کہیا کہ 6 ہزار جنگجوؤاں تے مشتمل ٹی ٹی پی جنگجو افغانستان وچ موجود نیں، طالبان نے ٹی ٹی پی دے خلاف کارروائی نہ کیتی تے پاکستان اپنے تحفظ لئی اقدامات کریگا۔ اوہناں نے کہیا کہ افغانستان فیر دہشتگرد گروہاں تے اوہناں دے پراکسی عناصر دی پناہ گاہ بن چکیا اے، افغان سرزمین توں پُھٹن والی دہشت گردی پاکستان لئی سنگین خطرہ اے، ٹھوس شواہد نیں کہ افغانستان وچ دہشتگرد گروہ باہمی تعاون کر رہے نیں۔عاصم افتخار نے کہیاکہ پاکستان نے دراندازی دی متعدد کوششاں نوں کامیابی نال نکام بنایا ، ساڈی بہادر فورسز تے عام شہریاں نے عظیم قربانیاں دتیاں نیں۔ اوہناں نے کہیا کہ اقوام متحدہ دی ٹیم نے وی ٹی ٹی پی دی افغان سرزمین تے موجودگی دی تصدیق کیتی۔ پاکستان دے مستقل مندوب نے کہیاکہ افغانستان دی صورتحال دے تباہ کن نتائج خطے تے اثرات مرتب کر رہے نیں ، جنگ ختم ہو چکی اے، افغان مہاجرین اپنے وطن واپس جان۔
