اداکاراں نوں کپڑے چُندے ہوئےاپنی حداں دا خیال رکھنا چاہیدا اے فضا علی
پاکستانی اداکارہ تے میزبان فضا علی نے پاکستانی اداکاراواں نوں چھوٹے کپڑے پاون دے حوالے نال مشورہ دتا اے تے آکھیا اے کہ اوہناں نوں اسلامی جمہوریہ پاکستان دے ماحول تے اپنی ثقافت دا خیال رکھنا چاہیدا اے۔
حال ہی وچ ٹک ٹاکر سوزین خان دا انٹرویو کردے ہوئے فضا علی نے آکھیا کہ پاکستانی شوبز والیاں نوں لباس چُندے ہوئے اپنیاں حداں دا خیال رکھنا چاہیدا اے کیونکہ پاکستان اک اسلامی ملک اے۔ فضا علی دا کہنا سی کہ میرے خیال وچ اداکاراواں نوں اپنیاں حداں وچ رہنا چاہیدا اے کیونکہ اسیں پاکستان وچ رہندے آں، سانوں اپنی ثقافت تے چلنا چاہیدا اے۔ جے اداکاراواں بولڈ لباس پاؤندیاں نیں تے اوہنوں اسلامی ملک وچ چنگا نہیں سمجھیا جاندا، جس توں بعد رولا پے جاندا اے تے تنقید شروع ہو جاندی اے کیونکہ لوک اپنیاں اداکاراواں نوں ایس انداز وچ ویکھنا پسند نہیں کردے۔
انٹرویو دے دوران میزبان نے سوزین خان دیاں پرانیاں بولڈ سوشل میڈیا ویڈیوواں دا وی ذکر کیتا تے اوہناں توں سوال کیتا کہ اوہناں نے اپنیاں وائرل بولڈ ریلز (Reels) حالے تک ڈیلیٹ کیوں نہیں کیتیاں۔
ایس گل بات توں بعد سوشل میڈیا اُتے ورتن والیاں ولوں ملے جلے ردعمل سامنے آ رہے نیں۔
