“اسلام آباد وڈی تباہی توں بچ گیا، بلوچستان توں خاتون خودکش بمبار گرفتار۔”
وزیراعلیٰ بلوچستان سرفراز بگٹی دا کہنا اے کہ انٹیلیجنس ایجنسیاں نے بروقت کارروائی کر کے پاکستان نوں اک وڈی تباہی توں بچا لیا اے۔
کوئٹہ وچ پریس کانفرنس کردے ہوئے اوہناں دسیا کہ اک خاتون خودکش حملہ آور نوں گرفتار کیتا گیا اے جیہڑی اسلام آباد وچ وڈا دھماکا کرنا چاہندی سی۔ وزیراعلیٰ نے آکھیا کہ مودی تے انتہا پسنداں دے پالے ہوئے غنڈے ساڈیاں دھی بھیناں نوں ورغلا کے دہشت گردی لئی ورت رہے نیں۔
اوہناں مزید آکھیا کہ مٹھی بھر لوک بلوچستان دے امن نوں تباہ کرنا چاہندے نیں پر ساڈے جری جوان تے ایجنسیاں اوہناں دے ہر ناپاک ارادے نوں مٹی وچ ملا دین گیاں۔ گرفتار خاتون دے حوالے نال اوہناں دسیا کہ دہشت گرد ٹولے معصوم لوکاں نوں ڈرا دھمکا کے یا پیسیاں دا لالچ دے کے ایہو جہے کماں لئی تیار کردے نیں، جیہڑا ساڈی بلوچ روایت دے بالکل خلاف اے۔
وزیراعلیٰ نے واشگاف لفظاں وچ آکھیا کہ ریاست توں وڈا کوئی نہیں تے جیہڑا وی قانون ہتھ وچ لوے گا، اوہنوں عبرت دا نشان بنا دتا جائے گا۔
