“بھارتی سٹاک مارکیٹ وِچ بھونچال، سرمایہ کاراں دے تقریباً 9 ہزار ارب روپے ڈب گئے”
بھارتی سٹاک مارکیٹ وِچ پیر دے دیہاڑے ایڈی وڈی مندی ویکھی گئی کہ سرمایہ کاراں دے تقریباً 9 ٹریلین (8900 ارب) بھارتی روپے ڈب گئے۔
’پرو پاکستانی‘ دے مطابق، کچے تیل دیاں ودھدیاں قیمتاں، بھارتی روپے اُتے ودھدے دباؤ تے وزیراعظم نریندر مودی ولوں شہریاں نوں اک سال تیکر سونا نہ خریدن دی اپیل نے مارکیٹ وِچ بھرتھو پا دتا۔
بمبئی سٹاک ایکسچینج دا ’سینسیکس‘ 1,400 پوائنٹس یعنی 1.9 فیصد ڈگ کے 73,198 اُتے بند ہویا، جدکہ ’این ایس ای نفٹی‘ 22,150 دی نفسیاتی سطح توں وی تھلے آ گیا۔ ایس وڈی گراوٹ پاروں بی ایس ای وِچ رجسٹرڈ کمپنیاں دی کُل مالیت 8.9 ٹریلین گھٹ کے تقریباً 3,842.2 ٹریلین روپے رہ گئی اے۔ مارکیٹ وِچ بینکنگ، پیٹرولیم، آٹو موبائل تے ایئر لائنز دے شعبیاں وِچ وڈے پیمانے اُتے شیئرز ویچے گئے، جدکہ عالمی حالات دی وجہ توں آئی ٹی سیکٹر وی دباؤ وِچ رہا۔
بھارتی میڈیا دے مطابق، ایس مندی دیاں وڈیاں وجہاں وِچ دنیا بھر وِچ تیل دیاں قیمتاں دا ودھنا، امریکہ تے ایران وِچکار جنگ دی کھِچ دھوہ تے پاکستان وِچ ’معرکہ حق‘ دیاں تقریباں توں بعد پیدا ہون والی صورتحال شامل اے، جس نے بھارتی معیشت تے بیرونی توازن بارے سرمایہ کاراں دے خدشے ودھا دتے نیں۔
